നയൻതാരയുടെ ജീവിതത്തെ ആസ്പദമാക്കി നെറ്റഫിക്ല്സ് അവതരിപ്പിക്കുന്ന നയന്‍താര: ബിയോണ്ട് ദ് ഫെയറി ടെയ്‌ലിന്റെ ട്രെയ്‌ലർ പുറത്ത്. നയൻതാരയുടെ ജീവിതവും കുടുംബവും കരിയറിലെ ഉയർച്ച താഴ്ചകളും വിവാഹവുമെല്ലാം ഉൾപ്പെടുത്തി കൊണ്ടുള്ളതാണ് ഡോക്യുമെന്ററി. നയൻതാരയുടെ പിറന്നാൾ ദിനത്തിലായിരിക്കും ഡോക്യുമെന്ററി സ്ട്രീംചെയ്യുക. ഈ മാസം 18നാണ് നയൻതാരയുടെ പിറന്നാൾ.
നയൻതാരയെ കുറിച്ച് താരങ്ങളും സംവിധായകനും കുടുംബവുമാെക്കെ സംസാരിക്കുന്നത് വിഡിയോയിൽ കാണാം. ഗൗതം വാസുദേവ് മേനോനാണ് ഡോക്യുമെന്ററി സംവിധാനം ചെയ്തത്. നടിയുടെ അമ്മ ഓമന കുര്യൻ, നാഗാർജുന, റാണ ദഗ്ഗുബാട്ടി, തപ്സി പന്നു, ആറ്റ്ലി, നെൽസൺ തുടങ്ങിയവരാണ് ട്രെയിലറിലുള്ളത്. നയൻതാരയുമായി ബന്ധപ്പെട്ട പല വിവാദങ്ങളെക്കുറിച്ചും താരം സംസാരിക്കുന്നുണ്ട്. ഭർത്താവ് വിഘ്നേഷ് ശിവനുമായുള്ള പ്രണയവും കുടുംബ ജീവിതത്തേക്കുറിച്ചുമെല്ലാം നമുക്ക് നയൻതാരയുടെ വാക്കുകളിലൂടെ തന്നെ കേൾക്കാം.
Also Read: ഡാനിയൽ ക്രെയ്‌ഗിൻ്റെ സ്വവർഗ്ഗാനുരാഗ ചിത്രം വിലക്കി തുര്‍ക്കി ഫിലിം ഫെസ്റ്റിവല്‍
2022 ജൂണ്‍ ഒന്‍പതിന് മഹാബലിപുരത്തെ ഷെറാട്ടണ്‍ ഗ്രാന്‍ഡ് റിസോര്‍ട്ടില്‍ വെച്ചായിരുന്നു നയന്‍താര- വിഘ്നേഷ് വിവാഹം. വിവാഹത്തിന്റെ സ്ട്രീമിങ് അവകാശത്തിനു വേണ്ടി 25 കോടിയാണ് പ്രതിഫലമായി നയന്‍താരയ്ക്കും വിഘ്‌നേശിനും നെറ്റ്ഫ്‌ലിക്‌സ് നല്‍കിയതെന്നാണ് റിപ്പോര്‍ട്ടുകള്‍. സംവിധായകന്‍ വിഘ്നേഷ് ശിവനുമായുള്ള വിവാഹത്തേക്കുറിച്ചുള്ള ഡോക്യുമെന്ററിയായാണ് നയന്‍താര: ബിയോണ്ട് ദ് ഫെയറി ടെയ്‌ൽ ആദ്യം പ്രഖ്യാപിച്ചത്. പിന്നീട് താരത്തിന്റെ കരിയര്‍ കൂടി ഉള്‍പ്പെടുത്തി ഡോക്യു- ഫിലിം ആക്കുകയായിരുന്നു.
