മലപ്പുറം: എസ്.സി വിഭാഗത്തിൽ നീറ്റ് കേരള മെഡിക്കൽ റാങ്ക് പട്ടികയിൽ സംസ്ഥാനതലത്തിൽ ഒന്നാം റാങ്ക് നേടി കെ. അതുൽ കൃഷ്ണ. അതുൽ കൂട്ടിലങ്ങാടി പള്ളിപ്പുറം സ്വദേശിയാണ്. മഞ്ചേരി ബോയ്സ് ഹയർ സെക്കൻഡറി സ്കൂളിൽനിന്നും ഹൈസ്കൂൾ, ഹയർ സെക്കൻഡറി പഠനം പൂർത്തിയാക്കി ഒരു വർഷമായി നീറ്റ് പരിശീലനം നടത്തി വരികയായിരുന്നു റാങ്ക് ഹോൾഡർ അതുൽ.
മലപ്പുറത്തെ മഞ്ചേരി ലേണേഴ്സ് അക്കാദമിയിലായിരുന്നു നീറ്റ്പരിശീലനം. അതേസമയം അതുൽ 10ാം തരത്തിലും പ്ലസ് ടുവിലും എല്ലാ വിഷ‍യങ്ങൾക്കും എ പ്ലസ് നേടിയിരുന്നു. നിലവിൽ കോഴിക്കോട് മെഡിക്കൽ കോളജിൽ എം.ബി.ബി.എസിന് ചേരാനാണ് അതുലിന് ആഗ്രഹം. മഞ്ചേരി ബോയ്സ് ഹയർ സെക്കൻഡറി സ്കൂൾ അധ്യാപകൻ കുണ്ടുമണ്ണിൽ സുകുമാരന്റെയും മങ്കട പള്ളിപ്പുറം ജി.യു.പി സ്കൂൾ അധ്യാപിക ഷീജയുടെയും മകനാണ്.
അതുലിന്റെ സഹോദരൻ അമൽ മഞ്ചേരി ബോയ്സ് ഹയർ സെക്കൻഡറിയിലെ സയൻസ് വിദ്യാർഥിയാണ്. റാങ്ക് നേട്ടത്തിൽ സന്തോഷമുണ്ടെന്നും മഞ്ചേരി ലേണേഴ്സ് അക്കാദമിയിലെ അധ്യാപകരുടെ പിന്തുണ തന്റെ വിജയത്തിൽ ഏറെ പങ്കുവഹിച്ചെന്നും അതുൽ പ്രതികരിച്ചു.
