ലോകകപ്പ് കാണാന്‍ താല്‍പര്യമില്ലെന്ന വെളിപ്പെടുത്തലുമായി ഐ.പി.എല്ലിലെ രാജസ്ഥാന്‍ റോയല്‍സ് താരം റിയാന്‍ പരാഗ്. ഇപ്പോള്‍ ലോകകപ്പിലെ സാധ്യതകളെ കുറിച്ച് ചോദിച്ചപ്പോഴാണ് താരത്തിന്റെ മറുപടി. ഇത്തവണ ലോകകപ്പ് കാണാന്‍ പോലും താല്‍പര്യമില്ലെന്നാണ് സ്വകാര്യ ചാനലുമായി സംസാരിക്കവെ പരാഗ് വെളിപ്പെടുത്തിയത്.
ഈ സീസണില്‍ 15 മത്സരങ്ങളില്‍ 573 റണ്‍സടിച്ച് ലോകകപ്പ് ടീമില്‍ ഉള്‍പ്പെട്ടേക്കുമെന്ന പ്രതീക്ഷയിലായിരുന്നു താരം. എന്നാല്‍ ടീം പ്രഖ്യാപിച്ചപ്പോള്‍ 15 അംഗ സംഘത്തിലോ റിസര്‍വ് പട്ടികയിലോ പരാഗിന് ഇടമുണ്ടായിരുന്നില്ല.
താന്‍ കളിച്ചിരുന്നെങ്കില്‍ ട്വന്റി 20 ലോകകപ്പിനെക്കുറിച്ച് തനിക്ക് ആശങ്കയുണ്ടാകുമായിരുന്നെന്നും എന്നാല്‍, ഇപ്പോള്‍ തനിക്ക് വലിയ താല്‍പര്യമില്ലെന്നും പരാഗ് പറഞ്ഞു. ‘ആദ്യത്തെ നാല് ടീമുകളെക്കുറിച്ച് പ്രവചിച്ചാല്‍ അതൊരു പക്ഷപാതപരമായ ഉത്തരമായിരിക്കും. സത്യസന്ധമായി പറഞ്ഞാല്‍ എനിക്ക് ലോകകപ്പ് കാണാന്‍ പോലും താല്‍പര്യമില്ല. ആരാണ് വിജയിക്കുന്നതെന്ന് ഞാന്‍ അവസാനം കാണുകയും സന്തോഷിക്കുകയും ചെയ്യും. ഞാന്‍ ലോകകപ്പ് കളിക്കുമ്പോള്‍ ആദ്യ നാല് സ്ഥാനങ്ങളിലെത്തുന്ന ടീമുകളെ കുറിച്ചും ആലോചിക്കും’ -എന്നിങ്ങനെയായിരുന്നു പരാഗിന്റെ പ്രതികരണം. വിവാദ പരാമര്‍ശങ്ങളിലൂടെ പലപ്പോഴും ആരാധകരെ ഞെട്ടിച്ച താരമാണ് പരാഗ്.
