ബേസില്‍ ജോസഫ്, നിഖില വിമല്‍, ഗ്രേസ് ആന്റണി എന്നീ മൂന്ന് പേരുകാരോടൊപ്പം ജീത്തു ജോസഫ് എന്ന പേര് കൂടെ ചേരുമ്പോള്‍ പ്രേക്ഷകര്‍ സാക്ഷ്യം വഹിക്കാന്‍ പോവുന്നത് കോമഡി ഫാമിലി എന്റര്‍ടെയ്‌നറായ ‘നുണക്കുഴി’ എന്ന ചിത്രത്തിനാണ്. ചിത്രത്തിന്റെ ട്രെയിലറിന് വന്‍ വരവേല്‍പ്പാണ് സോഷ്യല്‍ മീഡിയയില്‍ ലഭിച്ചത്. ബേസില്‍ ജോസഫും ഗ്രേസ് ആന്റണിയും ആദ്യമായി നായകനും നായികയുമായി എത്തുന്ന ഈ ചിത്രം ബേസില്‍ ജോസഫ്-നിഖില വിമല്‍ കോംബോ വീണ്ടും സ്‌ക്രീനില്‍ പ്രത്യക്ഷപ്പെടുന്ന ചിത്രവുമാണ്. യു/എ സര്‍ട്ടിഫിക്കറ്റോടെ നാളെ (ഓഗസ്റ്റ് 15) ചിത്രം തിയറ്ററുകളിലെത്തും.
ജീത്തു ജോസഫിന്റെ ഭുരിഭാഗം ചിത്രങ്ങളുടെയും തിരക്കഥ അദ്ദേഹം തന്നെയാണ് തയ്യാറാക്കിയിട്ടുള്ളത്. എന്നാല്‍ ‘നുണക്കുഴി’യുടെ തിരക്കഥ രചിച്ചിരിക്കുന്നക് ‘ട്വെല്‍ത്ത് മാന്‍’, ‘കൂമന്‍’ എന്നിവയുടെ തിരക്കഥാകൃത്തായ കെ ആര്‍ കൃഷ്ണകുമാറാണ്. ഏറെ വ്യത്യസ്ത പുലര്‍ത്തി ഒരുങ്ങുന്ന ഈ ചിത്രത്തില്‍ സിദ്ദിഖ്, മനോജ് കെ ജയന്‍, ബൈജു സന്തോഷ്, അജു വര്‍ഗീസ്, സൈജു കുറുപ്പ്, അല്‍ത്താഫ് സലിം, ലെന, സ്വാസിക, ബിനു പപ്പു, അസീസ് നെടുമങ്ങാട്, സെല്‍വരാജ്, ശ്യാം മോഹന്‍, ദിനേശ് പ്രഭാകര്‍, കലാഭവന്‍ യുസഫ്, രാജേഷ് പറവൂര്‍, റിയാസ് നര്‍മ്മകല, അരുണ്‍ പുനലൂര്‍, ശ്യാം തൃക്കുന്നപുഴ, സന്തോഷ് ലക്ഷ്മണന്‍, കലാഭവന്‍ ജിന്റോ, സുന്ദര്‍ നായക് തുടങ്ങി നിരവധി താരങ്ങളാണ് അണിനിരക്കുന്നത്.
