ആലപ്പുഴ: ട്രാഫിക് നിയമം ലംഘിച്ചതിന് ശിക്ഷിക്കപ്പെട്ട യൂട്യൂബര്‍ സഞ്ജു ടെക്കിയെ മാഗസീന്‍ ഉദ്ഘാടന പരിപാടിയില്‍ നിന്നും ഒഴിവാക്കി അധികൃതര്‍. മണ്ണഞ്ചേരി ഗവ. ഹൈസ്‌കൂളില്‍ നടക്കുന്ന മാഗസീന്‍ പ്രകാശനത്തില്‍ അതിഥിയായി സഞ്ജുവിനെ ക്ഷണിച്ചു, പക്ഷെ പരുപാടി വിവാദമായതോടെ സഞ്ജുവിനെ ഒഴിവാക്കി. സിപിഐഎം ഭരിക്കുന്ന ജില്ലാ പഞ്ചായത്താണ് പരിപാടി സംഘടിപ്പിക്കുന്നത്. പ്രസിഡന്റ് കെജി രാജേശ്വരിയാണ് പരിപാടിയുടെ അധ്യക്ഷ. സിപിഐഎം ജില്ലാ പഞ്ചായത്ത് അംഗം ആര്‍ റിയാസാണ് പരിപാടിയുടെ സംഘാടകന്‍.
അതേസമയം, തെറ്റ് തിരുത്താന്‍ അവസരം തരണമെന്നും, തന്നെ ഒരു സ്ഥിരം കുറ്റക്കാരനായി സമൂഹം കാണരുതെന്നും, തെറ്റ് ഏറ്റുപറഞ്ഞ് വിദ്യാര്‍ത്ഥികളോട് സംസാരിക്കാനാണ് താൻ ഉദ്ദേശിച്ചിരുന്നതെന്നും, സ്‌കൂളിലെ പരിപാടിയില്‍ നിന്നും ഒഴിവാക്കിയതില്‍ സങ്കടമുണ്ടെന്നും സഞ്ജു പറഞ്ഞു.
