ധാക്ക: അഞ്ച് പതിറ്റാണ്ടിനുശേഷമാണ് പാകിസ്ഥാനിൽ നിന്നുള്ള ചരക്ക് കപ്പൽ കഴിഞ്ഞ ആഴ്ച ബംഗ്ലാദേശിലെ ചിറ്റഗോങ് തുറമുഖത്ത് നങ്കൂരമിട്ടത്. പാനമയുടെ പതാകവെച്ച യുവാൻ സിയാങ് ഫാ സാൻ എന്ന 182 മീറ്റർ നീളമുള്ള കപ്പലാണ് ചിറ്റഗോങിൽ എത്തിയത്. നവംബർ 11-ന് ചിറ്റഗോങിൽനിന്ന് പുറപ്പെടുന്നതിനുമുൻപ് ചരക്ക് ഇറക്കിയതായി തുറമുഖത്തെ ഉന്നത ഉദ്യോഗസ്ഥനെ ഉദ്ധരിച്ച് വാർത്താ ഏജൻസിയായ എ.എഫ്.പി റിപ്പോർട്ടു ചെയ്തു.
പാകിസ്ഥാൻ, യു.എ.ഇ എന്നിവിടങ്ങളിൽനിന്നും വസ്ത്രവ്യാപാരത്തിനുള്ള അസംസ്കൃത വസ്തുക്കളും ഭക്ഷ്യവസ്തുക്കളുമായാണ് ബംഗ്ലാദേശിലേക്ക് കപ്പൽ എത്തിയത്. മുമ്പ്, പാകിസ്ഥാനിൽനിന്നുള്ള സാധനങ്ങൾ ബംഗ്ലാദേശിലേക്ക് കൊണ്ടുവന്നിരുന്നത് ഫീഡർ വെസലുകൾ വഴിയായിരുന്നു. ശ്രീലങ്ക, മലേഷ്യ, സിങ്കപ്പുർ എന്നിവിടങ്ങളിൽ എത്തിച്ച ശേഷം ഫീഡർ വെസലുകളിലേക്ക് ചരക്ക് മാറ്റാറാണ് പതിവ്.
Also Read: ഗാസയിലേക്കുള്ള ഭക്ഷ്യവസ്തുക്കൾ അടങ്ങിയ ലോറികൾ കൊള്ളയടിച്ചു
സെപ്റ്റംബറിൽ മുഹമ്മദ് യൂനുസിന്റെ നേതൃത്വത്തിൽ ഇടക്കാല ഭരണകൂടം ബംഗ്ലാദേശിൽ അധികാരത്തിൽ വന്നതിനുശേഷം പാക് ഉൽപന്നങ്ങളുടെ ഇറക്കുമതിയിലുള്ള നിയന്ത്രണങ്ങൾ ലഘൂകരിച്ചിരുന്നു. പാകിസ്ഥാനുമായുള്ള ബന്ധം ശക്തിപ്പെടുത്തുന്നതിലേക്കുള്ള ചുവടുവെപ്പായാണ് നേരിട്ടുള്ള സമുദ്ര ബന്ധത്തെ കണക്കാക്കുന്നത്. 1971-ലെ ബംഗ്ലാദേശ് വിമോചന യുദ്ധത്തിനുശേഷം മോശമായ ബന്ധം ഇരുരാജ്യങ്ങളും പുനഃസ്ഥാപിക്കാനുള്ള ശ്രമത്തിലാണ്.
ഇതോടെ ഇന്ത്യൻ സുരക്ഷാ കേന്ദ്രങ്ങളും ജാഗ്രതയിലാണ്. ഇരുരാജ്യങ്ങളും തമ്മിലുള്ള വ്യാപാരം വർധിപ്പിക്കുന്നതിന് നേരിട്ടുള്ള ഷിപ്പിങ് റൂട്ട് പ്രധാന ചുവടുവെപ്പാണെന്ന ധാക്കയിലെ പാക് പ്രതിനിധി സയിദ് അഹമ്മദ് മറൂഫിന്റെ പോസ്റ്റിനു ശേഷം സാമൂഹിക മാധ്യമങ്ങളിൽ വലിയ ചർച്ചയാണ് നടക്കുന്നത്.
