ജോജു ജോര്‍ജിന്‍റെ സംവിധാന അരങ്ങേറ്റ ചിത്രമാണ് പണി. തീയേറ്ററുകളിൽ വൻ സ്വീകാര്യതയാണ് ചിത്രത്തിന് ലഭിച്ചുകൊണ്ടിരിക്കുന്നത്. ജോജുവിനൊപ്പം സാഗര്‍ സൂര്യയും ജുനൈസ് വി പിയും പ്രധാന കഥാപാത്രങ്ങളെ അവതരിപ്പിച്ച ചിത്രം ആക്ഷന്‍ ത്രില്ലര്‍ ജോണറിൽ പെട്ടതാണ്. ആദ്യദിനം തന്നെ മികച്ച അഭിപ്രായം നേടിയ ചിത്രം ബോക്സ് ഓഫീസിലും മികച്ച പ്രകടനമാണ് കാഴ്ചവെക്കുന്നത്. ഇപ്പോഴിതാ മോഹൻ ലാലിനൊപ്പം തങ്ങളുടെ വിജയം ആഘോഷിച്ചിരിക്കുകയാണ് ടീം പണി.
ചിത്രത്തിലെ പ്രധാന കഥാപാത്രങ്ങളെ അവതരിപ്പിച്ച സാഗര്‍ സൂര്യ, ജുനൈസ് വി പി, ബോബി കുര്യന്‍ അടക്കമുള്ളവരെ അഭിനന്ദിക്കുകയും സന്തോഷം പങ്കുവെക്കുകയും ചെയ്യുന്ന മോഹന്‍ലാലിനെ വീഡിയോയില്‍ കാണാം. ജുനൈസ് ആണ് ഇന്‍സ്റ്റഗ്രാമിലൂടെ വീഡിയോ പങ്കുവച്ചിരിക്കുന്നത്. ബിഗ് ബോസ് മുന്‍ മത്സരാര്‍ഥികളായ സാഗറിനെയും ജുനൈസിനെയും ആ നിലയില്‍ മോഹന്‍ലാലിന് നേരത്തേ അറിയാം.
ALSO READ: ദീപാവലി ഔട്ട്ഫിറ്റിൽ സുന്ദരിയായെത്തി കരിഷ്മ
പ്രശാന്ത് അലക്സ്, സുജിത് ശങ്കർ തുടങ്ങി വൻ താരനിരയും, കൂടാതെ അറുപതോളം പുതിയ താരങ്ങളും ചിത്രത്തില്‍ അഭിനയിച്ചിട്ടുണ്ട്. ബിഗ് ബജറ്റില്‍ ഒരുങ്ങിയ സിനിമയുടെ ഷൂട്ട് 110 ദിവസത്തോളം നീണ്ടിരുന്നു. സാഗർ ജുനൈസ് കൂട്ടുകെട്ടിന് വൻ സ്വീകാര്യതയാണ് ലഭിച്ചുകൊണ്ടിരിക്കുന്നത്. ത്രിശൂർ ഭാഷ പ്രയോഗങ്ങൾ അനായാസകരമായി ഇവർ കൈകാര്യം ചെയ്യുന്നുണ്ട്. സിനിമയുടെ വിജയം മോഹൻ ലാലിനൊപ്പം ആഘോഷിച്ച സന്തോഷത്തിലാണ് താരങ്ങൾ.
