ബെംഗളൂരു: കര്‍ണ്ണാടകയിലെ ഷിരൂരില്‍ ഇന്ന് നടത്തിയ തെരച്ചിലില്‍ കാണാതായ കോഴിക്കോട് സ്വദേശി അര്‍ജുന്റെ ട്രക്കിന്റെ ഭാഗങ്ങള്‍ കണ്ടെത്തി. ട്രക്കിലെ വാട്ടര്‍ടാങ്ക് ക്യാരിയര്‍ ആണ് കണ്ടെത്തിയത്. നാവികസേന മാര്‍ക്ക് ചെയ്ത കോണ്‍ടാക്ട് പോയിന്റ് നാലിന് സമീപത്ത് നിന്നാണ് ലോഹവസ്തു കണ്ടെത്തിയത്.
മേഖലയില്‍ നാളെ രാവിലെ കൂടുതല്‍ തെരച്ചില്‍ ആരംഭിക്കും. ഇന്ന് വൈകിട്ട് ആറ് മണിയോടെയാണ് ഡ്രഡ്ജര്‍ ദൗത്യമേഖലയിലേക്ക് എത്തിച്ചത്. ഡൈവിങ് സംഘവും ഈശ്വര്‍ മല്‍പ്പെയും പരിശോധനയ്ക്കെത്തിയിട്ടുണ്ട്. മൂന്ന് ദിവസത്തെ ഉടമ്പടിയാണെങ്കിലും പത്ത് ദിവസം വരെ നീട്ടാവുന്ന രീതിയിലാണ് ഉടമ്പടി തയ്യാറാക്കിയതെന്ന് കമ്പനി അറിയിച്ചിട്ടുണ്ട്.വലിയ മണ്‍കൂനകള്‍ ദൗത്യമേഖലയില്‍ രൂപപ്പെട്ടിട്ടുള്ളതിനാല്‍ തന്നെ മൂന്ന് ദിവസം കൊണ്ട് ഡ്രഡ്ജിങ് പൂര്‍ത്തിയാക്കാന്‍ കഴിഞ്ഞേക്കില്ല. ദൗത്യത്തിനൊപ്പം ഉണ്ടാവുമെന്ന് ഈശ്വര്‍ മല്‍പെ അറിയിച്ചിട്ടുണ്ട്.
