ഷാർജ: ഷാർജയിൽ പേ പാർക്കിങ് സമയം രാത്രി 12 മണിവരെ നീട്ടി. നവംബർ ഒന്ന് മുതലാണ് ഷാർജയിൽ പെയ്ഡ് പാർക്കിങ്ങിന്റെ പുതിയ സമയക്രമം നിലവിൽ വരുക. അവധി ദിനങ്ങളിൽ ഉൾപ്പെടെ ആഴ്ചയിൽ എല്ലാ ദിവസവും പാർക്കിങ് ഫീസ് ഈടാക്കുന്ന സോണുകളിലാണ് ഫീസ് നൽകേണ്ട സമയം അർധരാത്രി വരെ നീട്ടിയത്. തിരക്കേറിയ ഈ മേഖലകളിൽ പാർക്കിങ് കൂടുതൽ സുഗമമാക്കാനാണ് ഫീസ് നൽകേണ്ട സമയം 16 മണിക്കൂറായി ദീർഘിപ്പിക്കുന്നത്.
Also Read: ലോകത്തിലെ ഏറ്റവും വലിയ കെട്ടിടത്തിന്റെ നിര്മാണത്തിന് തുടക്കം കുറിച്ച് സൗദി അറേബ്യ
നേരത്തേ രാവിലെ എട്ട് മുതൽ രാത്രി 10 വരെയായിരുന്നു ഈ മേഖലകളിൽ പാർക്കിങ് ഫീസ് ബാധകമായിരുന്നത്. അതേസമയം, പ്രതിദിന പാർക്കിങ് ഫീസ് അല്ലാതെ എല്ലാ ദിവസവും പാർക്കിങ് ആവശ്യമുള്ളവർക്ക് പെയ്ഡ് പാർക്കിങിനുള്ള ഓപ്ഷനുകളും ഷാർജ മുനിസിപ്പാലിറ്റി അടുത്തിടെ പുറത്തിറക്കിയിട്ടുണ്ട്.
രണ്ട് രീതിയിലാണ് സബ്സ്ക്രിപ്ഷൻ പ്ലാൻ. ഇതിൽ തന്നെ വ്യക്തികൾക്കും ബിസിനസ് സ്ഥാപനങ്ങൾക്കും ഇഷ്ടാനുസരണം വിവിധ പ്ലാനുകൾ തെരഞ്ഞെടുക്കാം. ഷാർജയിലെ എല്ലായിടത്തും പാർക്ക് ചെയ്യാവുന്നതും രണ്ട് പ്രത്യേക ഏരിയകളിൽ മാത്രം പാർക്കു ചെയ്യാവുന്നതുമാണ് പ്ലാൻ. പ്ലാനുകൾക്ക് അനുസരിച്ച് ഫീസിൽ മാറ്റമുണ്ടാകും. 10 ദിവസം മുതൽ 12 മാസം വരെയുള്ള പ്ലാനുകളാണ് അവതരിപ്പിച്ചിരിക്കുന്നത്. എല്ലായിടത്തും പാർക്ക് ചെയ്യാവുന്ന ഓപ്ഷനിൽ പത്ത് ദിവസത്തേക്ക് 170 ദിർഹമും 12 മാസത്തേക്ക് 2850 ദിർഹമുമാണ് ഫീസ്.