ഫാഷന്‍ സെന്‍സില്‍ മമ്മൂട്ടിയെ മറികടക്കാന്‍ മലയാള സിനിമയിലെ ചെറുപ്പക്കാര്‍ക്കുപോലും കഴിയാറില്ലെന്ന് പറയാറുണ്ട് ആളുകൾ. സിനിമകളുടെ തെരഞ്ഞെടുപ്പിലും നടത്തിയ പ്രകടനത്തിലും ഇന്ത്യന്‍ സിനിമയില്‍ തന്നെ സമീപകാലത്ത് ഏറ്റവും വിസ്മയിപ്പിച്ചുകൊണ്ടിരിക്കുന്ന നടനാണ് മമ്മൂട്ടി. ഈ 73-ാം വയസിലും ശരീര സംരക്ഷണം മമ്മൂട്ടി ഗൗരവമായി തന്നെ നോക്കി നടത്തുന്നു.
സിനിമയിലെ ഏത് തരം റോളിലും തന്നിലെ അഭിനേതാവിനെ പൂര്‍ണ്ണമായും വിട്ടുനല്‍കാന്‍ അദ്ദേഹത്തിനെ പ്രാപ്തനാക്കുന്ന ഒരു ഘടകവും ഇത് തന്നെയാണ്. സ്ക്രീനിന് വെളിയില്‍ അദ്ദേഹം ധരിക്കുന്ന വസ്ത്രങ്ങള്‍ പലപ്പോഴും സോഷ്യല്‍ മീഡിയയില്‍ വലിയ ട്രെന്‍ഡ് സൃഷ്ടിക്കാറുണ്ട്. ഇപ്പോഴിതാ അത്തരത്തില്‍ മമ്മൂട്ടിയുടെ പുതിയൊരു ചിത്രവും സോഷ്യല്‍ മീഡിയയില്‍ തരംഗമായിരിക്കുകയാണ്.
ALSO READ: അഭിനയത്തിന്റെ പെരുന്തച്ചൻ വിടവാങ്ങിയിട്ട് 12 വർഷം
പ്രിന്‍റുകള്‍ ഉള്ള പ്ലസ് സൈസ് ഹാഫ് സ്ലീവ് ഷര്‍ട്ടും അതേ നിറത്തിലുള്ള പാന്‍റ്സും മാച്ച് ചെയ്യുന്ന ഷൂസും തൊപ്പിയുമൊക്കെയാണ് വൈറല്‍ ചിത്രത്തില്‍ മമ്മൂട്ടി ധരിച്ചിരിക്കുന്നത്. ഒപ്പം സണ്‍ ഗ്ലാസും ധരിച്ചിട്ടുണ്ട്. ഫേസ്ബുക്ക്, ഇന്‍സ്റ്റഗ്രാം, എക്സ് എന്നീ സോഷ്യല്‍ മീഡിയ പ്ലാറ്റ്ഫോമുകളിലൊക്കെ അദ്ദേഹം ചിത്രം പങ്കുവെച്ചിട്ടുണ്ട്. ലൈക്കുകളുടെയും കമ്മെന്റുകളുടെയും ചാകരയാണ് ചിത്രത്തിന് വന്നുകൊണ്ടിരിക്കുന്നത്. ഏജ് ഇന്‍ റിവേഴ്സ് ഗിയര്‍ കമന്‍റുകളാണ് ആരാധകരില്‍ അധികവും നല്‍കിയിരിക്കുന്നത്.
ടര്‍ബോ ആണ് മമ്മൂട്ടിയുടേതായി അവസാനം എത്തിയ റിലീസ്. നവാഗതനായ ഡീനൊ ഡെന്നിസിന്‍റെ സംവിധാനത്തിലെത്തുന്ന ബസൂക്ക, ഗൗതം വസുദേവ് മേനോന്‍ സംവിധാനം ചെയ്യുന്ന ഡൊമിനിക് ആന്‍ഡ് ദി ലേഡീസ് പഴ്സ് എന്നിവയാണ് മമ്മൂട്ടിയുടേതായി വരാനിരിക്കുന്ന പുതിയ ചിത്രങ്ങള്‍.
