ബ്ലാസ്‌റ്റേഴ്‌സിൻറെ വെറ്ററൻ ഡിഫൻഡർ പ്രീതം കോട്ടാൽ ക്ലബ്ബ് വിടുമെന്നാണ് ഇപ്പോൾ പുറത്തുവരുന്ന റിപ്പോർട്ടുകൾ. പ്രീതത്തെ നിലനിർത്താൻ ക്ലബ്ബ് തയ്യാറാവില്ല എന്നാണ് സൂചന. പ്രീതം കോട്ടാലിന്റെ മുൻ ക്ലബ്ബായ മോഹൻ ബഗാൻ സൂപ്പർ ജയന്റ്‌സിലേക്ക് തന്നെയാണ് താരം മാറുന്നതെന്നാണ് കരുതപ്പെടുന്നത്.
പ്രീതം കോട്ടാലിന് വേണ്ടി മോഹൻ ബഗാൻ സജീവമായി ട്രാൻസ്ഫർ രംഗത്തുണ്ട്. ഒരു സ്വാപ്പ് ഡീലിലൂടെയായിരിക്കും താരം മുൻ ക്ലബ്ബിലേക്ക് ചേക്കേറുക. അതേസമയം സൂപ്പർ താരം ദീപക് ടാംഗ്രിയുമായുള്ള കരാർ മോഹൻ ബഗാൻ അവസാനിപ്പിച്ചെന്ന വാർത്തകളും പുറത്തുവരുന്നുണ്ട്. പ്രീതത്തിന് പകരം ദീപക്കിനെ ബ്ലാസ്റ്റേഴ്സിന് നൽകിയുള്ള സ്വാപ്പ് ഡീലിനായിരിക്കും മോഹൻ ബഗാൻ ഒരുങ്ങുക. ഇതുമായി ബന്ധപ്പെട്ട് കൂടുതൽ വിവരങ്ങൾ ഉടൻ തന്നെ പുറത്തുവരും.
കഴിഞ്ഞ സീസണിലാണ് പ്രീതം ബ്ലാസ്റ്റേഴ്സിന്റെ തട്ടകത്തിലെത്തിയത്. മോഹൻ ബഗാന് വേണ്ടി ഡിഫൻസിൽ മിന്നും പ്രകടനം പുറത്തെടുത്ത പ്രീതത്തിന് ബ്ലാസ്റ്റേഴ്സിൽ അത്ര കണ്ട് തിളങ്ങാനായിരുന്നില്ല. 19 മത്സരങ്ങളിൽ ബ്ലാസ്റ്റേഴ്സിന് വേണ്ടി കളത്തിലിറങ്ങിയ പ്രീതത്തിന്റെ വീഴ്ചകൾ പലപ്പോഴും ബ്ലാസ്റ്റേഴ്സിന് ഗോൾ വഴങ്ങുന്നതിന് കാരണമായിരുന്നു.
Also read: ക്ലബ് മാറ്റ സൂചന നൽകി മുഹമ്മദ് സലാ
ഇന്ത്യൻ സൂപ്പർ ലീഗ് 11-ാം പതിപ്പിന്റെ വിവരങ്ങൾ ചുവടെ:
ഇന്ത്യൻ സൂപ്പർ ലീഗിന്റെ 11-ാം പതിപ്പിന് സെപ്റ്റംബർ 13നാണ് തുടക്കമാവുന്നത്. കഴിഞ്ഞ സീസണിലെ ചാമ്പ്യന്മാരായ മോഹൻ ബഗാൻ സൂപ്പർ ജയന്റ്സും ഫൈനലിസ്റ്റുകളായ മുംബൈ സിറ്റിയും തമ്മിൽ കൊൽക്കത്തയിലാണ് ഉദ്ഘാടന മത്സരം. സെപ്റ്റംബർ 15നാണ് കേരളാ ബ്ലാസ്റ്റേഴ്സ് ആദ്യ മത്സരത്തിനിറങ്ങുന്നത്. കൊച്ചി ജവഹർലാൽ നെഹ്റു സ്റ്റേഡിയത്തിൽ നടക്കുന്ന മത്സരത്തിൽ പഞ്ചാബ് എഫ് സിയാണ് ബ്ലാസ്റ്റേഴ്സിന്റെ എതിരാളികൾ.
