പാലക്കാട്: പി.പി ദിവ്യക്ക് ജാമ്യം കിട്ടിയതിനെതിരെ പ്രതികരിച്ച് സംസ്ഥാന ബിജെപി അധ്യക്ഷൻ കെ.സുരേന്ദ്രൻ. ദിവ്യയ്ക്ക് ജാമ്യം കിട്ടിയത് ആഭ്യന്തര വകുപ്പും പ്രോസിക്യൂഷനും സഹായിച്ചത് കൊണ്ടാണെന്ന് കെ.സുരേന്ദ്രൻ കുറ്റപ്പെടുത്തി. ജാമ്യാപേക്ഷയിൽ പ്രതിഭാഗം നവീൻ ബാബുവിന്‍റെ കുടുംബത്തിനെതിരെ ഉന്നയിച്ച ആരോപണത്തെ എതിർക്കാൻ പ്രോസിക്യൂഷൻ തയ്യാറായില്ലെന്നും പാലക്കാട് നടത്തിയ വാർത്താസമ്മേളനത്തിൽ അദ്ദേഹം പറഞ്ഞു.
ജില്ലാ കളക്ടർ നൽകിയ മൊഴിയാണ് പ്രതിഭാഗത്തിന് അനുകൂലമായ നടപടിയുണ്ടാകാൻ കാരണം. ഗോവിന്ദന്റെ പ്രസ്താവന ജനങ്ങളോടുള്ള വെല്ലുവിളിയാണ്. എന്തിന്റെ അടിസ്ഥാനത്തിലാണ് ദിവ്യ തിരുത്തുമെന്ന് ഗോവിന്ദൻ പറയുന്നത്. ദിവ്യയെ പുറത്താക്കുകയാണ് വേണ്ടതെന്നും സുരേന്ദ്രൻ കുറ്റപ്പെടുത്തി. പാർട്ടി ഇപ്പോൾ എടുത്ത നടപടി ജനങ്ങളെ കബളിപ്പിക്കാനാണെന്ന് കെ.സുരേന്ദ്രൻ പറഞ്ഞു.
