ധനുഷ് രചനയും സംവിധാനവും നിർവ്വഹിച്ച് ടൈറ്റിൽ കഥാപാത്രമായി അഭിനയിക്കുകയും ചെയ്ത രായൻ എന്ന ചിത്രത്തിലെ വീഡിയോ സോംഗ് അണിയറക്കാർ പുറത്തുവിട്ടു. അടങ്ങാത അസുരൻ എന്ന ഗാനത്തിന് വരികൾ എഴുതിയിരിക്കുന്നതും ധനുഷ് ആണ്. സംഗീതം എ ആർ റഹ്‍മാൻ ആണ്. എ ആർ റഹ്‍മാനും ധനുഷും ചേർന്നാണ് ആലപിച്ചിരിക്കുന്നത്. എ എച്ച് കാഷിഫ് ആണ് മ്യൂസിക് സൂപ്പർവൈസർ.
തമിഴ് സിനിമയിൽ ഈ വർഷത്തെ മികച്ച വിജയങ്ങളിലൊന്നാണ് രായൻ. ആക്ഷൻ ക്രൈം വിഭാഗത്തിൽ പെടുന്ന ചിത്രം ആഗോള ബോക്സ് ഓഫീസിൽ നിന്ന് 150 കോടിയിലേറെ നേടിയിരുന്നു. സൺ പിക്ചേഴ്സിൻറെ ബാനറിൽ കലാനിധി മാരൻ നിർമ്മിച്ച ചിത്രം ജൂലൈ 26 നാണ് തിയറ്ററുകളിൽ എത്തിയത്. ആമസോൺ പ്രൈം വീഡിയോയിലൂടെ ഓഗസ്റ്റ് 23 ന് ചിത്രം ഒടിടി സ്ട്രീമിംഗും ആരംഭിക്കും.
ധനുഷിനൊപ്പം എസ് ജെ സൂര്യ, സെൽവരാഘവൻ, പ്രകാശ് രാജ്, സുന്ദീപ് കിഷൻ, കാളിദാസ് ജയറാം, ദുഷറ വിജയൻ, അപർണ ബാലമുരളി, വരലക്ഷ്മി ശരത്‍കുമാർ, ശരവണൻ, ദിലീപൻ, ഇളവരസ്, ദിവ്യ പിള്ള, സിങ്കംപുലി, ദേവദർശിനി, രവി മരിയ, നമോ നാരായണ, മുനീഷ്കാന്ത് തുടങ്ങി വലിയൊരു താരനിരയാണ് ചിത്രത്തിൽ അഭിനയിച്ചിരിക്കുന്നത്.
ഓം പ്രകാശ് ആണ് ഛായാഗ്രഹണം. പ്രസന്ന ജി കെ ആണ് എഡിറ്റർ. ഫാസ്റ്റ് ഫുഡ് കട നടത്തുകയാണ് ചിത്രത്തിൽ ധനുഷിൻറെ രായൻ. അപ്രതീക്ഷിതമായി അധോലോകവുമായി ഏറ്റുമുട്ടേണ്ടിവരുന്നു ഇയാൾക്ക്. തുടർന്നുള്ള സംഭവ വികാസങ്ങളാണ് ചിത്രത്തെ ഉദ്വേഗഭരിതമാക്കുന്നത്. എസ് ജെ സൂര്യയാണ് ധനുഷിൻറെ പ്രതിനായകനായി ചിത്രത്തിൽ എത്തുന്നത്.
