പാലക്കാട്: സിപിഎം പുറത്തുവിട്ട സിസിടിവി ദൃശ്യത്തിന് മറുപടിയുമായി രാഹുല്‍ മാങ്കൂട്ടത്തില്‍. സുഹൃത്തും താനും രണ്ട് വാഹനത്തിലാണ് ഹോട്ടലില്‍ നിന്ന് പോയതെന്ന് രാഹുല്‍. താന്‍ കയറിയത് ഷാഫി പറമ്പിലിന്റെ കാറിലാണെന്നും തന്റെ കാറിലാണ് സുഹൃത്ത് വന്നതെന്നും രാഹുല്‍ മാങ്കൂട്ടത്തില്‍ പറഞ്ഞു.
ചില കാര്യങ്ങള്‍ സംസാരിക്കാനുണ്ടായിരുന്നത് കൊണ്ടാണ് ഷാഫിക്കൊപ്പം കാറില്‍ കയറിയത്. സുഹൃത്ത് കൊണ്ടുവന്ന തന്റെ കാറിന് തകരാര്‍ ഉണ്ടായതിനാല്‍ സര്‍വീസിന് കൊടുക്കാന്‍ സുഹൃത്തിനെ ഏല്‍പ്പിച്ചു. പിന്നീട് മറ്റൊരു കാറിലാണ് താന്‍ കോഴിക്കോടേക്ക് പോയതെന്നും അദ്ദേഹം പറഞ്ഞു.
പാലക്കാട് പ്രസ് ക്ലബിന് മുന്നില്‍ വെച്ചാണ് കാര്‍ മാറിക്കയറിയത്. ഇതിന് സിസിടിവി ദൃശ്യങ്ങള്‍ തെളിവുണ്ടെന്നും അത് മാധ്യമങ്ങള്‍ക്ക് പരിശോധിക്കാവുന്നതാണെന്നും അദ്ദേഹം പറഞ്ഞു. ഒപ്പം സുഹൃത്ത് തന്റെ കാറില്‍ കൊണ്ടുവന്ന ട്രോളി ബാഗുകള്‍ താന്‍ കോഴിക്കോടേക്ക് പോകാന്‍ ഉപയോഗിച്ച വാഹനത്തിലേക്ക് മാറ്റിയിരുന്നുവെന്നും രാഹുല്‍ പാലക്കാട് മാധ്യമപ്രവര്‍ത്തകരോട് പറഞ്ഞു.
