യുഎഇ: വീണ്ടും മഴ മുന്നറിയിപ്പുമായി യുഎഇ. ഇന്ന് രാത്രി മുതല്‍ മറ്റന്നാള്‍ രാവിലെ വരെ പരക്കെ മഴ ലഭിക്കുമെന്നാണ് മുന്നറിയിപ്പ്. അതേസമയം ആശങ്കപ്പെടേണ്ട സാഹചര്യമില്ലെന്ന് കാലാവസ്ഥാ നിരീക്ഷണകേന്ദ്രം മുന്നറിയിപ്പില്‍ വ്യക്തമാക്കി. മഴ മുന്നറിയിപ്പിന്റെ പശ്ചാത്തലത്തില്‍ ദുബായിലെ സ്വകാര്യ സ്‌കൂളുകളില്‍ ഓണ്‍ലൈന്‍ പഠനം പ്രഖ്യാപിച്ചു. രാജ്യത്തിന്റെ പടിഞ്ഞാറന്‍ മേഖലയില്‍ ഒറ്റപ്പെട്ട മഴയായി തുടങ്ങി നാളെ രാവിലെയോടെ മിക്ക മേഖലകളിലും മഴ ശക്തമാവും. പലയിടങ്ങളിലും മഴയ്‌ക്കൊപ്പം കാറ്റും ഇടിമിന്നലും ആലിപ്പഴ വര്‍ഷത്തിനും സാധ്യതയുണ്ടെന്നും അധികൃതര്‍ വ്യക്തമാക്കി.
മഴ മുന്നറിയിപ്പിന്റെ പശ്ചാത്തലത്തില്‍ രാജ്യത്തെ, ദുരന്ത നിവാരണ അതോരിറ്റി, ആഭ്യന്തര മന്ത്രാലയം എന്നിവര്‍ കഴിഞ്ഞ ദിവസം സംയുക്ത യോഗംചേര്‍ന്ന് സ്ഥിതിഗതി വിലയിരുത്തി. ഏത് പ്രതികൂല സാഹചര്യത്തെ നേരിടാനും എല്ലാവിധ മുന്നൊരുക്കങ്ങളും സ്വീകരിച്ചതായി അധികൃതര്‍ അറിയിച്ചു. അതിനിടെ ഈമാസം 16-ന് രാജ്യത്തു പെയ്തതുപോലെ അതിശക്ത മഴ ഇത്തവണ ഉണ്ടാകില്ലെന്നും പൊതുജനങ്ങള്‍ ആശങ്ക പെടേണ്ട സാഹചര്യമില്ലെന്നും കാലാവസ്ഥാ നിരീക്ഷണ കേന്ദ്രം വ്യക്തമാക്കിയിട്ടുണ്ട്. മഴ മുന്നറിയിപ്പിന്റെ പശ്ചാത്തലത്തില്‍ വ്യാഴം, വെള്ളി ദിവസങ്ങളില്‍ ദുബായിലെ സ്വകാര്യ സ്‌കൂളുകളില്‍ ഓണ്‍ലൈന്‍ പഠനം പ്രഖ്യാപിച്ചിട്ടുണ്ട്.
