കണ്ണൂർ: പയ്യന്നൂരിലെ വ്യാജ പോലീസിനെ ഒറിജിനൽ പോലീസ് കയ്യോടെ പൊക്കി. തളിപ്പറമ്പ് സ്വദേശി ജയ്‌സണെയാണ് പോലീസ് പിടികൂടിയിരിക്കുന്നത്. കടകളിൽ കയറി പയ്യന്നൂർ എസ് ഐ ആണെന്ന് പറഞ്ഞ് പണം വാങ്ങുന്നത് പതിവായതോടെയാണ് വ്യാജ പോലീസാണെന്ന് തട്ടിപ്പിനിരയായവർക്ക് മനസിലായത്.
പയ്യന്നൂരിലെ വ്യാപാര സ്ഥാപനങ്ങളിലാണ് ആദ്യം ഇയാൾ പോലീസ് ആണെന്ന് പരിചയപ്പെടുത്തി പണം കടം വാങ്ങിയത്. പിന്നീട് സമാനമായ രീതിയിൽ തളിപ്പറമ്പിൽ തട്ടിപ്പ് നടത്താൻ ശ്രമിച്ചു. എന്നാൽ ജയ്‌സണെ തിരിച്ചറിഞ്ഞ വ്യാപാരികൾ പൊലീസിൽ അറിയിക്കുകയും പോലീസെത്തി അറസ്റ്റ് ചെയ്യുകയുമായിരുന്നു.
പിലാത്തറ, ഏഴിലോട്, പയ്യന്നൂർ തുടങ്ങിയ സ്ഥലങ്ങൾ കേന്ദ്രീകരിച്ചായിരുന്നു തട്ടിപ്പ്. വന്ന വണ്ടിക്ക് കൊടുക്കാൻ കാശില്ലെന്നും പണം കടം വേണമെന്നും ഉടൻ തിരികെ നൽകാമെന്നും പറഞ്ഞാണ് 500 ൽ താഴെ തുക ഇയാൾ തട്ടുക. എന്നാൽ തിരികെ നൽകാമെന്ന് പറഞ്ഞ സമയം കഴിഞ്ഞപ്പോൾ തട്ടിപ്പിനിരയായെന്ന് കടയുടമകൾ മനസ്സിലാക്കുകയുമായിരുന്നു.
