കൊല്ലം: ഇടത് മുന്നണിയുടെ പൗരത്വ പ്രതിഷേധത്തിനെതിരെ ആര്‍എസ്പി നേതാവും മുന്‍ എംഎല്‍എയുമായ ഷിബു ബേബി ജോണ്‍. ഇടത് മുന്നണിക്ക് രാഷ്ട്രീയ പാപ്പരത്വമാണെന്നും ബിജെപി മുന്നോട്ടു വെയ്ക്കുന്ന നയങ്ങള്‍ക്ക് അനുസരിച്ച് മുന്നോട്ടു പോകുകയാണെന്നും ഷിബു ബേബി ജോണ്‍ പറഞ്ഞു. ബിജെപിയുടെ ആഗ്രഹപ്രകാരം പൗരത്വം വിഷയമാക്കുകയാണ് ഇടതുമുന്നണി. ബിജെപിയുടെ കെണിയാണ് പൗരത്വം. ബിജെപി ആഗ്രഹിക്കുന്നതാണ് പിണറായി നടപ്പാക്കുന്നത്. സിപിഎം നടത്തുന്നത് ചിഹ്നം സംരക്ഷിക്കുന്നതിനുള്ള പോരാട്ടമാണ്. സിഎഎ ആരുടേയും പൗരത്വം നഷ്ടപ്പെടുത്തുന്നില്ല.
പൗരത്വം നല്‍കുന്നത് മതത്തിന്റെ അടിസ്ഥാനത്തിലാകുന്ന ഭരണഘടനാ വിരുദ്ധമായതുകൊണ്ടാണ് അതിനെ എതിര്‍ക്കുന്നത്. അതിനാല്‍ നിയമപോരാട്ടത്തിലൂടെ ഇതിനെ തടയാനാകും. അതില്‍ നിന്ന് വ്യത്യസ്തമായി പിണറായി വിജയന്‍ ഇങ്ങനെ ഒരു നിലപാടുമായി പോകുമ്പോള്‍ ഒരു കാര്യം വ്യക്തമാണ്. ഇതിന്റെ കഥയും തിരക്കഥയും നരേന്ദ്ര മോദിയും സംഭാഷണവും പശ്ചാത്തല സംഗീതവും പിണറായി വിജയനുമാണെന്ന് ഷിബു ബോബി ജോണ്‍ പരിഹസിച്ചു.
ചെങ്കൊടിയുടെ നിറം മങ്ങി മങ്ങി കാവിയാകുകയാണ്. കൊല്ലത്ത് നിന്ന് പാര്‍ലമെന്റിലേക്ക് ആരെ വിടണം എന്നത് ജനം തീരുമാനിക്കട്ടെ. തമാശ പറയാന്‍ അല്ലല്ലോ പാര്‍ലിമെന്റിലേക്ക് പോകുന്നത്. ലോക്‌സഭയില്‍ ആരെങ്കിലും എഴുതികൊടുക്കുന്ന സ്‌ക്രിപ്റ്റ് വായിച്ചാല്‍ പോരല്ലോയെന്നും ഷിബു ബേബി ജോണ്‍ പറഞ്ഞു.
