ഇരിട്ടി: ആർക്കും മനസ്സിലാകാത്ത രീതിയിൽ പലചരക്ക് കടയുടെ മറവിൽ മദ്യവും നിരോധിത പുകയില ഉൽപന്നങ്ങളും വിറ്റ കടയുടമയെ ഇരിട്ടി എക്‌സൈസ് സംഘം അറസ്റ്റു ചെയ്ത് റിമാൻഡ് ചെയ്തു. ഇയാളുടെ കടയിൽനിന്ന് നിരവധി തവണ മദ്യവും, പുകയില ഉൽപന്നങ്ങളും വിൽക്കുന്നതായി പരാതിയുണ്ടായിരുന്നു. മീത്തലെ പുന്നാട്ടെ കടയുടമ എം.പി. രതീഷാണ് (39) റിമാൻഡിലായത്.
പരാതിയെ തുടർന്ന് നിരവധി തവണ എക്‌സൈസ് പരിശോധന നടത്തുകയും ചെയ്തിരുന്നു. ഒപ്പം കട അടപ്പിക്കണമെന്ന് ആവശ്യപ്പെട്ട് എക്‌സൈസ് ഇരിട്ടി നഗരസഭക്ക് കത്ത് നൽകിയിരുന്നു. തുടർന്ന് നഗരസഭ ആരോഗ്യവിഭാഗം നടത്തിയ പരിശോധനയിൽ സ്ഥാപനം തുറന്ന് പ്രവർത്തിക്കുന്നില്ലെന്നും അടച്ചിട്ട നിലയിലാണ് കാണുന്നതെന്നും റിപ്പോർട്ട് നൽകിയിരുന്നു. അതോടൊപ്പം സ്ഥാപനം തുറന്നു പ്രവർത്തിക്കുന്നത് ശ്രദ്ധയിൽപ്പെട്ടാൽ അടച്ചുപൂട്ടി സ്ഥാപന ഉടമക്കെതിരെ നിയമനടപടി സ്വീകരിക്കുമെന്നും എക്‌സൈസിനെ അറിയിച്ചിരുന്നു. ഇതിനു പിന്നാലെ എക്‌സൈസ് നടത്തിയ പരിശോധനയിൽ കട തുറന്നു പ്രവർത്തിക്കുന്നത് കണ്ടെത്തുകയും, പരസ്യമായി മദ്യവിൽപന ചെയ്യുന്നത് കൈയോടെ പിടികൂടുകയും ആയിരുന്നു.
Also Read :സ്ത്രീകളുടെ തലയ്ക്കടിച്ച് മോഷണം; ഗൊരഖ്പൂരിനെ വിറപ്പിച്ച മോഷ്ടാവ് പിടിയിൽ
പരിശോധനയിൽ രണ്ടു കുപ്പി മദ്യമാണ് കടയിൽ നിന്നും പിടികൂടിയത്. അതേസമയം കടയിൽനിന്ന് ഒരാൾക്ക് ഗ്ലാസിൽ മദ്യം ഒഴിച്ചുകൊടുക്കുന്നതിനിടയിലാണ് രതീഷ് എക്‌സൈസിന്റെ പിടിയിലാകുന്നത്.
