മക്ക: ഹജ്ജ് വിസയുമായി എത്തുന്നവർ വിസ കാലാവധി തീരുംമുമ്പ് രാജ്യത്തുനിന്ന് മടങ്ങണമെന്ന് ഹജ്ജ് ഉംറ മന്ത്രാലയം വ്യക്തമാക്കി. നിശ്ചിത സമയത്തിനുള്ളിൽ പോകാതിരുന്നാൽ നിയമലംഘനമായി കണക്കാക്കും. ശിക്ഷാവിധി ആവശ്യപ്പെടുന്ന നിയമലംഘനമാണെന്നും മന്ത്രാലയം പറഞ്ഞു.വിസ കാലഹരണപ്പെടുന്നതിന് മുമ്പ് പുറപ്പെടുന്നതാണ് ഏറ്റവും മികച്ച രീതി. ഹജ്ജ് വിസ ഹജ്ജിന് മാത്രമേ സാധുതയുള്ളൂ. ആ വിസ ജോലി ചെയ്യാൻ അനുവദിക്കുന്നില്ലെന്നും മന്ത്രാലയം പറഞ്ഞു.
വാർഷിക ഹജ്ജ് തീർത്ഥാടനത്തിനായി വിശുദ്ധ നഗരങ്ങളായ മക്കയിലേക്കും മദീനയിലേക്കും തീർഥാടകരുടെ ഒഴുക്ക് സുഗമമാക്കുന്നതിനാണ് ഈ ക്രമീകരണം ലക്ഷ്യമിടുന്നത്. മൂന്ന് മാസത്തെ ഉംറ വിസയുടെ സാധുത കാലയളവ് സൗദി അറേബ്യയിലേക്കുള്ള പ്രവേശന തീയതി ഇഷ്യൂ ചെയ്യുന്ന തീയതി മുതൽ ആരംഭിക്കുമെന്നും മന്ത്രാലയം വ്യക്തമാക്കി. മന്ത്രാലയത്തിൻ്റെ എക്‌സ് പ്ലാറ്റ്‌ഫോം വഴി ലഭിച്ച അന്വേഷണങ്ങൾക്ക് മറുപടിയായാണ് ഈ വിശദീകരണം.
