കണ്ണൂര്: പ്രണയപ്പകയുടെ പേരില് വിഷ്ണുപ്രിയ എന്ന യുവതിയെ കൊലപ്പെടുത്തിയ കേസില് ശ്യംജിത്ത് കുറ്റക്കാരനെന്ന് കോടതി. പ്രണയത്തില് നിന്ന് പിന്വാങ്ങിയതിന്റെ വൈരാഗ്യത്തില് പാനൂരിനടുത്ത് വള്ള്യായി കണ്ടോത്തുംചാല് നടമ്മലില് വിഷ്ണുപ്രിയ(25)-നെ വീട്ടില്ക്കയറി കഴുത്തറത്തും കൈഞരമ്പുകളും മുറിച്ച് കൊലപ്പെടുത്തിയ കേസിലാണ് ശ്യംജിത്ത് അറസ്റ്റിലായത്. കൂത്തുപറമ്പിനടുത്ത് മാനന്തേരി താഴെകളത്തില് വീട്ടില് എം. ശ്യാംജിത്ത്(28) നെയാണ് ആണ് കോടതി കുറ്റാക്കാരനെന്ന് കണ്ടെത്തിയത്. ശിക്ഷാ വിധി തിങ്കളാഴ്ചത്തേക്ക് മാറ്റി. 2022 ഒക്ടോബര് 22 ശനിയാഴ്ച്ച ഉച്ചയ്ക്ക് 12 മണിയോടെയായിരുന്നു ദാരുണമായ സംഭവം.
വിഷ്ണുപ്രിയയും ശ്യാംജിത്തും പ്രണയത്തിലായിരുന്നെന്നും കൊലപാതകം നടക്കുന്നതിന് രണ്ടുമാസംമുന്പ് ഇവര് തെറ്റിപ്പിരിഞ്ഞെന്നും ഇതാണ് കൊലപാതകത്തിന് കാരണമെന്നുമായിരുന്നു പോലീസ് പറഞ്ഞത്.
ഖത്തറില് ജോലിചെയ്യുന്ന വിനോദിന്റെയും ബിന്ദുവിന്റെയും മകളാണ് വിഷ്ണുപ്രിയ. കഴുത്തിന് ആഴത്തില് മുറിവേറ്റ നിലയിലാണ് വിഷ്ണുപ്രിയയെ കണ്ടത്. ഇരുകൈകള്ക്കും വെട്ടേല്ക്കുകയും ചെയ്തിരുന്നു. കൈഞരമ്പ് മുറിച്ച് മരണം ഉറപ്പാക്കുകയും ചെയ്തു. 29 മുറിവുകളായിരുന്നു വിഷ്ണുപ്രിയയുടെ ശരീരത്തിലുണ്ടായിരുന്നത്. ഇതില് പത്ത് മുറിവുകളും മരണശേഷമായിരുന്നു. പ്രതി ശ്യാംജിത്ത് വീട്ടിലെത്തിയതും കൊലപാതകം നടത്തിയതും പരിസരവാസികളൊന്നും അറിഞ്ഞില്ല.