ചെന്നൈ: പാമ്പ് കടിയേറ്റാൽ വിവരം സർക്കാരിനെ അറിയിക്കാൻ ആശുപത്രികൾക്ക് നിർദേശം നൽകി തമിഴ്നാട് സർക്കാർ. സംസ്ഥാനത്ത് പാമ്പ് കടിയേറ്റുള്ള മരണങ്ങൾ കൂടിയതോടെയാണ് സർക്കാരിന്റെ നടപടി. പാമ്പുകടിയേല്‍ക്കുന്നതിനെ അതീവ ഗൗരവമായി കാണാനാണ് സര്‍ക്കാരിന്റെ തീരുമാനം. പാമ്പുകടിക്കുന്നതിനെ പൊതുജനാരോഗ്യ നിയമത്തിന് കീഴില്‍ ഉള്‍പ്പെടുത്തിയതായി സര്‍ക്കാര്‍ അറിയിച്ചു.
വിവരശേഖരണം, ക്ലിനിക്കല്‍ ഇന്‍ഫ്രാസ്ട്രക്ചര്‍, പാമ്പുകടി മൂലമുള്ള മരണങ്ങള്‍ തടയാന്‍ മറുമരുന്ന് ലഭ്യമാക്കല്‍ എന്നിവ മെച്ചപ്പെടുത്തുന്നതിന്റെ ഭാഗമായാണ് തീരുമാനം. ഈ വര്‍ഷം ജൂണ്‍ ഏഴുവരെ 7,300 പേര്‍ക്കാണ് തമിഴ്‌നാട്ടില്‍ പാമ്പുകടിയേറ്റത്. ഇതില്‍ 13 പേര്‍ മരിക്കുകയും ചെയ്തു.
Also Read: പശ്ചിമ ബംഗാളിൽ ട്രെയിൻ അപകടം
പാമ്പുകടിയേറ്റ എല്ലാ സംഭവങ്ങളും ആശുപത്രികളിൽ റിപ്പോർട്ട് ചെയ്യപ്പെടാത്തത് വിവരശേഖരണത്തിൽ തടസം വരുത്തിയെന്ന് ഉദ്യോഗസ്ഥർ അറിയിച്ചു. ചികിത്സയ്ക്ക് ആവശ്യമായ ആൻ്റിവെനം ലഭ്യമാക്കാൻ വിവരശേഖരണം കൂടുതൽ ശക്തമാക്കാനാണ് സർക്കാർ ഉദ്ദേശിക്കുന്നത്.
രാജ്യത്തെ ഏറ്റവും മികച്ച ആരോഗ്യ പരിരക്ഷാ സംവിധാനങ്ങളാണ് സംസ്ഥാനത്തുള്ളത്. എന്നിട്ടും പാമ്പുകടിയേല്‍ക്കുന്നതിനെതിരെയുള്ള പ്രതിരോധമരുന്ന് ആവശ്യമായ അളവില്‍ ലഭ്യമല്ലാത്തതാണ് ചികിത്സയില്‍ കാലതാമസത്തിനും മരണത്തിനും ഇടയാക്കുന്നത്. പാമ്പുകടിയേറ്റുള്ള മരണങ്ങള്‍ പകുതിയായി കുറയ്ക്കാനാണ് പുതിയ പദ്ധതി ലക്ഷ്യമിടുന്നത്.
