നമ്മുടെ തൊടിയിലും വേലിയിറമ്പത്തുമെല്ലാം നില്‍ക്കുന്ന ധാരാളം സസ്യങ്ങളുണ്ട്. പലതും ഏറെ ഔഷധ ഗുണങ്ങളുള്ളവയാണ്. മെഡിക്കല്‍ സയന്‍സ് പണ്ട് ഇത്രയും വികസിയ്ക്കാത്ത കാലത്ത് രോഗങ്ങള്‍ക്കുള്ള പരിഹാരമായും ആരോഗ്യത്തിനായും ഇത്തരം പല സസ്യങ്ങളും പൂര്‍വികര്‍ ഉപയോഗിച്ചിരുന്നു. ആരോഗ്യത്തിനും സൗന്ദര്യത്തിനും മുടിയ്ക്കുമെല്ലാം തന്നെ ഔഷധ ഗുണം നല്‍കുന്നവയായിരുന്നു ഇത്. ചിലപ്പോള്‍ തീരെ ചെറിയ സസ്യമായിരിയ്ക്കും, എന്നാല്‍ മരുന്നു ഗുണം ഏറെയായിരിക്കും, ഇത്തരത്തില്‍ ഒന്നാണ് മുക്കുറ്റി. നമ്മുടെ കേരളത്തില്‍ സുലഭമായി കണ്ടു വരുന്ന ഒന്നാണിത്. നിലത്തോടു പറ്റി വളരുന്ന ഇതിന് ചെറിയ മഞ്ഞപ്പൂക്കളുണ്ടാകും. പൂജകള്‍ക്കും ആചാരാനുഷ്ഠാനങ്ങള്‍ക്കുമെല്ലാം മരുന്നായി ഉപയോഗിയ്ക്കുന്ന ഒന്നാണിത്.
ഇന്നത്തെ ജീവിതശൈലി, പാരമ്പര്യ രോഗങ്ങളിലൊന്നാണ് പ്രമേഹം. ഇത് അധികമായാല്‍ ഇന്‍സുലിന്‍ പോലുള്ള കുത്തിവയ്പ്പുകള്‍ അത്യാവശ്യമായി വരും. പ്രമേഹത്തിനുള്ള നല്ലൊന്നാന്തം മരുന്നാണിത്. ഇത് സമൂലം, അതായത് കടയോടെ പറിച്ച് കഴുകി വൃത്തിയാക്കി ചതച്ച് ഇത് വെള്ളത്തിലിട്ടു തിളപ്പിച്ചു കുടിയ്ക്കുന്നത് പ്രമേഹത്തിന് പരിഹാരമാണ്. ഇതിന്റെ ഇലച്ചാറും ഗുണകരമാണ്. ഇത് അടുപ്പിച്ചു കുടിയ്ക്കാം. യാതൊരു ദോഷവും വരുന്നില്ല. രക്തത്തിലെ ഗ്ലൂക്കോസ് തോത് നിയന്ത്രിയ്ക്കാന്‍ ഇതേറെ നല്ലതാണ്. ശരീരത്തില്‍ നിന്നും ടോക്സിനുകള്‍ നീക്കാന്‍ കഴിയുന്ന ഗുണമുളളതിനാല്‍ ക്യാന്‍സര്‍ പോലുള്ള രോഗങ്ങള്‍ക്കും ഇതേറെ നല്ലതാണ്. കോള്‍ഡ്, പനി, കഫക്കെട്ട്, ആസ്തമ തുടങ്ങിയ പ്രശ്നങ്ങള്‍ക്കുള്ള നല്ലൊരു നാട്ടുവൈദ്യം കൂടിയാണിത്.
വിട്ടുമാറാത്ത ചുമക്ക് മുക്കുറ്റി ചതച്ച് അതില്‍ ഒരു സ്പൂണ്‍ തേന്‍ മിക്‌സ് ചെയ്ത് കഴിച്ചാല്‍ മതി. മുക്കുറ്റി അരച്ചത് കരിക്കിന്‍ വെള്ളത്തില്‍ കലര്‍ത്തി കഴിയ്ക്കുന്നത് ആസ്തമയ്ക്കുള്ള നല്ലൊരു മരുന്നാണ്. പനി കാരണമുള്ള തലച്ചൂടും വേദനയും കുറയ്ക്കാന്‍ ഇതരച്ച് നെറ്റിയില്‍ ഇടാം. ഇതിട്ടു തിളപ്പിച്ച വെള്ളം നല്ലതാണ്. ഇത് കഫക്കെട്ട് ഒഴിവാക്കും. തേനില്‍ മുക്കുറ്റിനീര് കലര്‍ത്തി കുടിയ്ക്കുന്നത് കഫക്കെട്ടിനും ജലദോഷത്തിനും മരുന്നാണ്. കുട്ടികളുടെ ആരോഗ്യത്തിനു വേണം അധിക ശ്രദ്ധ. ആയുര്‍വേദ പ്രകാരം ശരീരത്തിലെ വാത, പിത്ത, കഫ ദോഷങ്ങള്‍ നീക്കാന്‍ സഹായിക്കുന്ന ഒന്നാണിത്. ഇവ ബാലന്‍സ് ചെയ്താല്‍ തന്നെ രോഗ വിമുക്തി നേടാം. ഇതിനു സഹായിക്കുന്ന, ശരീരത്തിന് തണുപ്പു നല്‍കുന്ന ഒന്നാണു മുക്കുറ്റി. ഇതിനു പുറമേ വിഷ ചികിത്സയ്ക്ക് ഉപയോഗിയ്ക്കുന്ന ഒന്നു കൂടിയാണിത്. വിഷ ജീവികളുടെ കടിയേറ്റാല്‍ ഈ ഭാഗത്ത് ഇത് അരച്ചു പുരട്ടിയാല്‍ മതിയാകും. ഇതിന്റെ ഇലകള്‍ വെറും വയറ്റില്‍ ചവച്ചരച്ചു കഴിയ്ക്കുന്നതും ഇത് അരച്ചു കഴിയ്ക്കുന്നതുമെല്ലാം നല്ലതാണ്.
വയറിന്റെ ആരോഗ്യത്തിനും ഇതേറെ ഉത്തമമാണ്. ദഹന സംബന്ധമായ പ്രശ്നങ്ങള്‍ക്ക് ഇതു നല്ലതാണ്. ഇത് അരച്ചു മോരില്‍ ചേര്‍ത്തു കഴിച്ചാല്‍ വയറിളക്കത്തില്‍ നിന്നും മോചനം നേടാം.സ്ത്രീ ജന്യമായ രോഗങ്ങള്‍ക്കുള്ള നല്ലൊരു പരിഹാരമാണിത്. പ്രത്യേകിച്ചും അസ്ഥിയുരുക്കം എന്നറിയപ്പെടുന്ന വജൈനല്‍ ഡിസ്ചാര്‍ജിന്. ഇത് അരച്ചു കഴിയ്ക്കുന്നത് നല്ലതാണ്. ഇതു പോലെ തന്നെ ആര്‍ത്തവ സംബന്ധമായ പ്രശ്നങ്ങള്‍ക്കും ഇതു മരുന്നാണ്. സ്ത്രീകളില്‍ പ്രസവ ശേഷം ഗര്‍ഭപാത്രം ശുദ്ധീകരിയ്ക്കുന്നതിന് പരമ്പരാഗത രീതിയില്‍ ഉപയോഗിയ്ക്കുന്ന മരുന്നാണിത്. മുക്കുറ്റിയുടെ ഇലയും പനംചക്കരയും ചേര്‍ത്തരച്ചു കഴിയ്ക്കുന്നത് ഗര്‍ഭപാത്രത്തിന്റെ ആരോഗ്യത്തിന് ഏറെ നല്ലതാണ്. അമിത രക്തസ്രാവം ഒഴിവാക്കാനും ഗര്‍ഭപാത്രം ശുദ്ധി ചെയ്യാനും ഇതേറെ നല്ലതാണ്. ലൈംഗിക പ്രശ്നങ്ങള്‍ക്കുളള മരുന്നുമാണ് മുക്കുറ്റി.
