മലപ്പുറം: കേരള സൂപ്പർ ലീഗ് അഞ്ചാം അംഗത്തിന് മാറ്റുരയ്ക്കാൻ തയ്യാറെടുത്ത് തൃശൂർ മാജിക് എഫ്.സിയും ഫോഴ്സാ കൊച്ചി എഫ്.സിയും. മഞ്ചേരി പയ്യനാട് സ്റ്റേഡിയത്തിൽ വൈകീട്ട് ഏഴരയോടെയാണ് മത്സരം ആരംഭിക്കുന്നത്. ടൂര്‍ണമെന്റില്‍ അഞ്ച് പോയന്റുമായി നാലാം സ്ഥാനത്താണ് ഫോഴ്സാ കൊച്ചി.
രണ്ട് പോയന്റുമായി തൃശൂർ പട്ടികയിൽ അവസാനമാണ്. കഴിഞ്ഞ മത്സരത്തിൽ ഹോം മാച്ചിൽ തിരുവനന്തപുരം കൊമ്പൻസ് എഫ്.സിയെ ഒന്നിനെതിരെ രണ്ട് ഗോളുകൾക്ക് പരാജയപ്പെടുത്തിയ ആത്മവിശ്വാസത്തിലാണ് ഫോഴ്സാ കൊച്ചി.
Also Read: ഇന്റര്‍നാഷണല്‍ ഫുട്‌ബോളില്‍ നിന്നും വിരമിച്ച് ഫ്രഞ്ച് സൂപ്പര്‍താരം അന്റോയിന്‍ ഗ്രീസ്മാന്‍
നാല് കളികളിൽ ഒരു വിജയവും രണ്ട് സമനിലയും ഒരു തോൽവിയുമാണ് ടീമിന്‍റെ സമ്പാദ്യം. മലപ്പുറം എഫ്.സിയോടാണ് ഏകപക്ഷീയമായ രണ്ട് ഗോളുകൾക്ക് ഫോഴ്സാ കൊച്ചി പരാജയം രുചിച്ചത്. കോഴിക്കോട് കോർപറേഷൻ സ്റ്റേഡിയത്തിൽ കാലിക്കറ്റ് എഫ്.സിയോടും കണ്ണൂർ എഫ്.സിയോടും സമനില.
ഇന്നത്തെ മത്സരത്തിൽ കൂടി വിജയമുറപ്പിച്ച് സെമി സാധ്യത നിലനിർത്താനാണ് കൊച്ചി മൈതാനത്തേക്കിറങ്ങുന്നത്. എന്നാൽ തൃശൂരിന്റെ കാര്യം അല്പം പരുങ്ങലിലാണ്. പോയന്റ് ടേബിളിൽ അവസാന സ്ഥാനത്തുള്ള ടീം ഇനിയുള്ള മത്സരങ്ങളില്‍ വിജയിച്ചില്ലെങ്കിൽ അവസാന നാലിലെത്തുക പ്രയാസമാകും.
