ഒരിടവേളയ്ക്ക് ശേഷം ആസിഫ് അലി ബോക്സ് ഓഫീസ് വിജയത്തിലേക്ക് തിരിച്ചെത്തിയ ചിത്രമായിരുന്നു തലവൻ. ആസിഫ് അലിക്കൊപ്പം ബിജു മേനോനും പ്രധാന കഥാപാത്രത്തെ അവതരിപ്പിച്ച ചിത്രം സംവിധാനം ചെയ്തത് ജിസ് ജോയ് ആയിരുന്നു. മെയ് 24 ന് ആയിരുന്നു ചിത്രത്തിൻറെ തിയറ്റർ റിലീസ്. ഇപ്പോഴിതാ മൂന്ന് മാസങ്ങൾക്ക് ശേഷം ചിത്രം ഒടിടിയിലേക്ക് എത്തുകയാണ്. തലവൻറെ ഒടിടി റിലീസിനെക്കുറിച്ച് നേരത്തേ റിപ്പോർട്ടുകൾ എത്തിയിരുന്നു. എന്നാൽ അത്തരം റിപ്പോർട്ടുകളിൽ ഉണ്ടായിരുന്ന റിലീസ് തീയതിയേക്കാൾ മുൻപേ ചിത്രം എത്തും.
സെപ്റ്റംബർ 12 ന് സോണി ലിവിലൂടെ ചിത്രം എത്തും എന്നായിരുന്നു റിപ്പോർട്ടുകൾ. പ്ലാറ്റ്ഫോം അതുതന്നെയെങ്കിലും റിലീസ് രണ്ട് ദിവസം മുൻപ് ആണ്. സെപ്റ്റംബർ 10 ന് തങ്ങളുടെ പ്ലാറ്റ്ഫോമിലൂടെ ചിത്രം സ്ട്രീമിംഗ് ആരംഭിക്കുമെന്ന് സോണി ലിവ് ഔദ്യോഗികമായി അറിയിച്ചിട്ടുണ്ട്. ഒപ്പം ഒടിടി റിലീസ് ട്രെയ്‍ലറും പുറത്തുവിട്ടിട്ടുണ്ട്. രണ്ട് മിനിറ്റിലേറെ ദൈർഘ്യമുള്ള ട്രെയ്‍ലർ ആണ് പുറത്തുവിട്ടിരിക്കുന്നത്.
ക്രൈം ത്രില്ലർ വിഭാഗത്തിൽ പെടുന്ന ചിത്രം അരുൺ നാരായൺ പ്രൊഡക്ഷൻസിന്റെയും ലണ്ടൻ സ്റ്റുഡിയോസിന്റെയും ബാനറുകളിൽ അരുൺ നാരായൺ, സിജോ സെബാസ്റ്റ്യൻ എന്നിവർ ചേർന്നാണ് നിർമ്മിച്ചിരിക്കുന്നത്. അനുശ്രീ, മിയ, ദിലീഷ് പോത്തൻ, കോട്ടയം നസീർ, ശങ്കർ രാമകൃഷ്ണൻ, ജോജി കെ. ജോൺ, ദിനേശ്, അനുരൂപ്, നന്ദൻ ഉണ്ണി, ബിലാസ് എന്നിവരും വേഷമിട്ടിരിക്കുന്നു. ശരത് പെരുമ്പാവൂർ, ആനന്ദ് തേവരക്കാട്ട് എന്നിവർ ചേർന്ന് തിരക്കഥ രചിച്ച തലവന് സംഗീതമൊരുക്കിയത് ദീപക് ദേവാണ്. ഛായാഗ്രഹണം ശരൺ വേലായുധൻ. എഡിറ്റിംഗ് സൂരജ് ഇ എസ്, കലാസംവിധാനം അജയൻ മങ്ങാട്, സൗണ്ട് രംഗനാഥ് രവി, മേക്കപ്പ് റോണക്സ് സേവ്യർ, കോസ്റ്റ്യൂം ജിഷാദ്, ചീഫ് അസോസിയേറ്റ് ഡയറക്ടർ സാഗർ.
