ബിജു മേനോൻ – ആസിഫ് അലി കോംബോയിൽ ജിസ് ജോയ് സംവിധാനം ചെയ്ത തലവൻ എന്ന ചിത്രം രണ്ടാം വാരത്തിലെത്തി നിൽകുമ്പോൾ വൻ വിജയമാണ് നേടിയിരിക്കുന്നത്. ചിത്രത്തിന്റെ വിജയാഘോഷത്തിലിതാ ഇപ്പോൾ മന്ത്രി വിഎൻ വാസവനും പങ്കുചേർന്നിരിക്കുന്നു. ചിത്രത്തിന്റെ അണിയറപ്രവർത്തകർ സമൂഹ മാധ്യമങ്ങളിൽ പങ്കുവച്ച ചിത്രത്തിലാണ് വിഎൻ വാസവൻ തലവൻ ടീമിന്റെ കൂടെ നിൽക്കുന്നത് കാണാൻ സാധിക്കുക.
രണ്ട് വ്യത്യസ്ത റാങ്കുകളിലുള്ള പൊലീസ് ഓഫീസർമാരുടെ ഇടയിലുണ്ടാകുന്ന പ്രശ്‌നങ്ങളാണ് തലവൻ പ്രേക്ഷകർക്ക് മുന്നിൽ അവതരിപ്പിക്കുന്നത്. അരുൺ നാരായൺ പ്രൊഡക്ഷൻസിന്റെയും ലണ്ടൻ സ്റ്റുഡിയോസിന്റെയും ബാനറുകളിൽ അരുൺ നാരായൺ, സിജോ സെബാസ്റ്റ്യൻ എന്നിവർ ചേർന്നാണ് ചിത്രം നിർമ്മിച്ചിരിക്കുന്നത്.
