ഹൈദരാബാദ്: ചായ ഉണ്ടാക്കി നല്‍കാത്തതിനെ ചൊല്ലിയുള്ള തര്‍ക്കം അവസാനിച്ചത് കൊലപാതകത്തില്‍. തര്‍ക്കത്തിനൊടുവില്‍ മകന്റെ ഭാര്യയെ ഭര്‍തൃമാതാവ് കഴുത്ത് ഞെരിച്ച് കൊന്നു. അത്താപൂരിന് സമീപം ഹസന്‍ നഗറില്‍ താമസിക്കുന്ന അജ്മീരി ബീഗം എന്ന 28 കാരിയാണ് ക്രൂരമായി കൊല്ലപ്പെട്ടത്. ഇന്നലെയാണ് നാടിനെ നടുക്കിയ സംഭവം.
പ്രതിയായ ഭര്‍തൃമാതാവ് ഫര്‍സാന, അജ്മീരിയോട് ചായ ഉണ്ടാക്കാന്‍ ആവശ്യപ്പെട്ടിരുന്നു. എന്നാല്‍, താന്‍ മറ്റ് ജോലികളില്‍ മുഴുകിയിരിക്കുകയാണെന്നും അതിനാല്‍ ഇപ്പോള്‍ ചായ ഉണ്ടാക്കി തരാന്‍ പറ്റില്ലെന്നും അജ്മീരിയ ഭര്‍തൃമാതാവിനെ അറിയിച്ചു. ഇതോടെ ഇരുവരും തമ്മില്‍ വഴക്കും കൈയാങ്കളിയുമായി. തുടര്‍ന്ന് ഫര്‍സാന യുവതിയെ സ്‌കാര്‍ഫ് ഉപയോഗിച്ച് കഴുത്ത് ഞെരിച്ച് കൊലപ്പെടുത്തുകയായിരുന്നു. വിവരമറിഞ്ഞ് പൊലീസ് സ്ഥലത്തെത്തി മൃതദേഹം പോസ്റ്റ്മോര്‍ട്ടത്തിനായി ഉസ്മാനിയ ജനറല്‍ ആശുപത്രിയിലേക്ക് മാറ്റി. സംഭവത്തില്‍ കേസെടുത്ത പൊലീസ് പ്രതിയെ അറസ്റ്റ് ചെയ്തു.
