മമ്മൂക്ക നായകനായ ‘ഭീഷ്മപര്‍വ്വം’ എന്ന ചിത്രത്തിന്റെ തിരക്കഥാകൃത്ത് ദേവദത്ത് ഷാജി തിരക്കഥയും സംവിധാനവും ഒരുക്കുന്ന പുതിയ ചിത്രം ‘ധീരന്‍’ എന്ന സിനിമയുടെ ഫസ്റ്റ് ലുക്ക് പോസ്റ്റര്‍ പുറത്തുവിട്ടു. ‘വികൃതി’ , ‘ജാന്‍.എ.മന്‍’, ‘ജയ ജയ ജയ ജയ ഹേ’, ‘ഫാലിമി’ എന്നീ ചിത്രങ്ങള്‍ക്ക് ശേഷം ലക്ഷ്മി വാര്യരും ഗണേഷ് മേനോനും ചേര്‍ന്നാണ് ചിത്രം നിര്‍മിക്കുന്നത്. ക്രിസ്റ്റോ സേവ്യറാണ് സംഗീതം. ലോഹിത ദാസിന്റെ മകന്‍ ഹരികൃഷ്ണന്‍ ലോഹിത ദാസ് ആദ്യമായി ക്യാമറ ചലിപ്പിക്കുന്ന ചിത്രം കൂടിയാണ് ധീരന്‍.
ചിത്രത്തിന് ആശംസകള്‍ അറിയിച്ച് നടന്‍ ഫഹദ് ഫാസില്‍ ഫേസ്ബുക്കില്‍ പോസ്റ്റ് ചെയ്തിട്ടുണ്ട്. സംവിധായകന്‍ അമല്‍ നീരദും ചിത്രത്തിന് ആശംസകള്‍ അറിയിച്ചിട്ടുണ്ട്. കുമ്പളങ്ങി നൈറ്റ് എന്ന ചിത്രത്തിന്റെ സഹ സംവിധായകന്‍ കൂടിയായിരുന്നു ദേവദത്ത് ഷാജി. അടുത്ത വര്‍ഷമായിരിക്കും ചിത്രത്തിന്റെ റിലീസ്. ചിത്രത്തിലെ താരങ്ങളുയും മറ്റു അണിയറ പ്രവര്‍ത്തകരെയും കുറിച്ചുള്ള വിവരങ്ങള്‍ ഒന്നും തന്നെ വെളിപ്പെടുത്തിയിട്ടില്ല.
