സൗദി അറേബ്യയിലെ ചെങ്കടലില്‍നിന്ന് കണ്ടെത്തിയ പുതിയ ഇനം മത്സ്യം ശാസ്ത്രലോകത്ത് ചര്‍ച്ചയായിരിക്കുകയാണ്. ദേഷ്യം വിട്ടുമാറാത്ത മുഖം, കൂര്‍ത്തുനീണ്ട പല്ലുകള്‍, ചുവന്നുതുടുത്ത ദേഹം എന്നിവ ചേർന്നതാണ് ഇതിന്റെ രൂപം. ദേഷ്യക്കാരനാണെങ്കിലും രണ്ട് സെന്റീമീറ്റര്‍ മാത്രം വലുപ്പമുള്ള ഈ ഇത്തിരിക്കുഞ്ഞന്റെ പേര് ‘ഗ്രംപി ഡ്വാര്‍ഫ്‌ ഗോബി’ എന്നാണ്. സൗദി അറേബ്യയുടെ ഫര്‍സാന്‍ തീരത്തിന് സമീപം പവിഴപ്പുറ്റുകളില്‍നിന്നാണ് ഇവയെ കണ്ടെത്തിയത്.
കിങ് അബ്ദുള്ള യൂണിവേഴ്‌സിറ്റി ഓഫ് സയന്‍സ് ആന്‍ഡ് ടെക്‌നോളജിയും അമേരിക്കയിലെ വാഷിങ്ടണ്‍ സര്‍വകലാശാലയും ചേര്‍ന്നാണ് ഈ ഇത്തിരിക്കുഞ്ഞനെ കണ്ടെത്തിയത്. ചുവപ്പോ ഓറഞ്ചു കലര്‍ന്ന മഞ്ഞയോ നിറത്തില്‍ കാണപ്പെടുന്ന ഇവ പവിഴപ്പുറ്റുകളില്‍ ഒളിഞ്ഞിരുന്ന് ഇരപിടിക്കും.ജലോപരിതലത്തില്‍നിന്നു 174 അടി മുതല്‍ 33 അടി വരെ താഴ്ചയിലാണ് ഇവ ജീവിക്കുന്നത്.
Also Read: സ്വതന്ത്ര പലസ്തീനിനായി അന്താരാഷ്ട്ര സഖ്യം പ്രഖ്യാപിച്ച് സൗദി അറേബ്യ
ഗ്രംപി ഡ്വാര്‍ഫ്‌ ഗോബിക്ക് ഫെയറി ഡ്വാര്‍ഫ്‌ ഗോബി എന്ന മീനുമായി സാമ്യമുണ്ട്. ഗവേഷകരില്‍ ഇത് ആശയക്കുഴപ്പം ഉണ്ടാക്കിയിരുന്നു. കൂടുതല്‍ പരിശോധനയിലാണ് ഇതൊരു പുതിയ സ്പീഷീസാണെന്ന് മനസിലാക്കിയത്.
