അത്ര സെയ്ഫല്ല ‘കരളിന്‍റെ’ കാര്യം! തള്ളരുത് ഈ മുന്നറിയിപ്പ്

ഇന്ത്യക്കാരിലെ പത്തിൽ മൂന്ന് പേർക്ക് കരൾ രോ​ഗമുള്ളതായി ആരോ​ഗ്യ മന്ത്രാലയം. ആളുകളിൽ നോൺ-ആൽക്കഹോളിക് ഫാറ്റി ലിവർ രോ​ഗം ബാധിക്കുന്നവരുടെ എണ്ണം വർദ്ധിച്ച് വരുന്നു.

അതായത് മദ്യപാനം കാരണമല്ലാതെ കൊഴുപ്പ് അടിഞ്ഞുകൂടിയുണ്ടാകുന്ന ഒരു കരൾ രോ​ഗമാണ് നോൺ ആൽക്കഹോളിക് ഫാറ്റി ലിവർ രോ​ഗം. നോൺ ആൽക്കഹോളിക് ഫാറ്റി ലിവർ ഡിസീസ് ഉണ്ടാകാനുള്ള സാധ്യത അമിതവണ്ണമുള്ളവരിൽ കൂടുതലാണ്. ഇത് ഇന്ത്യയിൽ വളരുന്ന ഒരു പ്രശ്നമാണെന്ന് കേന്ദ്ര ആരോഗ്യ സെക്രട്ടറി അപൂർവ ചന്ദ്ര പറഞ്ഞു.

കരളിൻ്റെ ആരോഗ്യം ഉറപ്പുവരുത്തുന്നതിനും നോൺ-ആൽക്കഹോളിക് ഫാറ്റി ലിവർ ഡിസീസ് തടയുന്നതിനും നമ്മൾ ജീവിതശെെലിയിൽ ശ്രദ്ധിക്കേണ്ട ചില കാര്യങ്ങൾ എന്തൊക്കെയാണെന്ന് നോയിഡയിലെ യഥാർത്ഥ് ഹോസ്പിറ്റൽ ഗ്യാസ്ട്രോഎൻറോളജി കൺസൾട്ടൻ്റ് ഡോ. അമോഗ് ദുദ്വേവാല പറയുന്നുണ്ട്.

Also Read: ഭക്ഷണത്തിൽ മല്ലിയില ഉൾപ്പെടുത്തൂ…തടയാം മുഖക്കുരു മുതൽ കരൾ രോഗങ്ങൾ വരെ…

ആരോഗ്യകരമായ ഭാരം നിലനിർത്തുക

നോൺ ആൽക്കഹോളിക് ഫാറ്റി ലിവർ രോ​ഗത്തിന്റെ ഒരു പ്രധാന അപകട ഘടകമാണ് പൊണ്ണത്തടി. സമീകൃതാഹാരത്തിലൂടെയും ചിട്ടയായ വ്യായാമത്തിലൂടെയും ആരോഗ്യകരമായ ഭാരം നിലനിർത്തുകയാണ് ആദ്യം വേണ്ടത്.

സമീകൃതാഹാരം കഴിക്കുക

ഭക്ഷണക്രമത്തിൽ പഴങ്ങൾ, പച്ചക്കറികൾ, ധാന്യങ്ങൾ, പ്രോട്ടീനുകൾ (പയർവർഗ്ഗങ്ങൾ, മത്സ്യം എന്നിവ പോലുള്ളവ) അടങ്ങിയവ ഉണ്ടാവാൻ പ്രത്യേക ശ്രദ്ധ കേന്ദ്രീകരിക്കുക. പൂരിത കൊഴുപ്പുകൾ, ശുദ്ധീകരിച്ച കാർബോഹൈഡ്രേറ്റ്, പഞ്ചസാര എന്നിവ പരിമിതപ്പെടുത്തുക.

പതിവായി വ്യായാമം ചെയ്യുക

ആഴ്ചയിൽ കുറഞ്ഞത് 150 മിനിറ്റെങ്കിലും മിതമായ എയറോബിക് വ്യായാമം ചെയ്യുക. കാരണം കരളിൽ അടിഞ്ഞ് കൂടിയിരിക്കുന്ന കൊഴുപ്പ് കുറയ്ക്കാൻ വ്യായാമം ഒരു ശീലമാക്കുന്നത് വളരെ സഹായിക്കും.

മദ്യം ഒഴിവാക്കുക

മദ്യപാനം പരിമിതപ്പെടുത്തുന്നത് വഴി കരൾ തകരാറിലാകാതിരിക്കാൻ സഹായിക്കും. കൂടാതെ, കീടനാശിനികളിൽ നിന്നും പാരിസ്ഥിതിക വിഷവസ്തുക്കളുമായി സമ്പർക്കം പുലർത്തുന്നത് ഒഴിവാക്കുക.

Also Read: ഫാറ്റി ലിവർ മാറ്റിയാലോ ; കുടിക്കൂ ഈ പാനീയങ്ങൾ

സുരക്ഷിതമായ ലൈംഗികത ഉറപ്പ് വരുത്തുക

ഹെപ്പറ്റൈറ്റിസ് ബി, സി എന്നിവ വിട്ടുമാറാത്ത കരൾ രോഗത്തിലേക്ക് നയിച്ചേക്കാം. സുരക്ഷിതമായ ലെെം​ഗിക ബന്ധത്തിലേർപ്പെടുക.

വാക്സിനേഷൻ എടുക്കുക

ഹെപ്പറ്റൈറ്റിസ് എ, ബി എന്നിവയ്‌ക്കുള്ള വാക്‌സിനുകൾ നിലവിൽ ലഭ്യമാണ്. വാക്സിനേഷൻ എടുത്തതായി തീർച്ചയായും ഉറപ്പ് വരുത്തുക.

മരുന്നുകളുടെ ഉപയോ​ഗം

ചില മരുന്നുകൾ നമ്മുടെ കരളിനെ ദോഷകരമായി ബാധിക്കും. അതുകൊണ്ട് തന്നെ ഡോക്ടറുടെ നിർദേശമില്ലാതെ മരുന്ന് കഴിക്കരുത്.

Also Read: വിത്തൗട്ട് കാപ്പി കുടിക്കുന്നത് ശീലമാക്കിയാലോ? അറിയാം പ്രയോജനങ്ങൾ

ആരോ​ഗ്യപരിശോധന ശീലമാക്കുക

കരൾ പ്രശ്നങ്ങൾ നേരത്തേ കണ്ടുപിടിക്കാൻ പതിവ് പരിശോധനകൾ സഹായിക്കും. നിങ്ങൾക്ക് അമിതവണ്ണമോ പാരമ്പര്യമായി കരൾ രോഗമോ ഉള്ളവരാണെങ്കിൽ തീർച്ചയായും ഇടയ്ക്കിടെ ആരോ​ഗ്യപരിശോധന നടത്തുക.