നാലാം തലമുറ നിസ്സാൻ എക്സ്-ട്രെയിൽ മൂന്നുവരി എസ്‌യുവി 2024 ജൂലൈയിൽ ഇന്ത്യൻ നിരത്തുകളിൽ എത്തും. പക്ഷേ അതിൻ്റെ ഔദ്യോഗിക ലോഞ്ച് തീയതി ഇതുവരെ പ്രഖ്യാപിച്ചിട്ടില്ല. ഔദ്യോഗിക വരവിന് മുന്നോടിയായി, കമ്പനി അതിൻ്റെ ചില ഡിസൈൻ വിശദാംശങ്ങളും സവിശേഷതകളും വെളിപ്പെടുത്തുന്ന രണ്ട് ടീസറുകൾ പുറത്തിറക്കി. ഡ്യുവൽ-ടോൺ സീറ്റ് അപ്‌ഹോൾസ്റ്ററിയോടു കൂടിയ ഒരു കറുത്ത ഇൻ്റീരിയർ തീം എസ്‌യുവിക്ക് ഉണ്ടായിരിക്കുമെന്ന് ഏറ്റവും പുതിയ ടീസർ സ്ഥിരീകരിക്കുന്നു. ഫ്ലോട്ടിംഗ് ഇൻഫോടെയ്ൻമെൻ്റ് സിസ്റ്റവും പൂർണ്ണമായും ഡിജിറ്റൽ ഡ്രൈവർ ഡിസ്‌പ്ലേയും ഉണ്ടാകും. ഇവ രണ്ടിനും 12.3 ഇഞ്ച് അളവ് ലഭിക്കാൻ സാധ്യതയുണ്ട്.
സെൻ്റർ കൺസോളിൽ ഡ്രൈവ് മോഡ് ബട്ടൺ, സ്റ്റോറേജുള്ള സ്പ്ലിറ്റ്-ടൈപ്പ് ഓപ്പണിംഗ് ആംറെസ്റ്റ്, ഓട്ടോ ഹോൾഡുള്ള ഇലക്ട്രോണിക് പാർക്കിംഗ് ബ്രേക്ക്, ഗിയർ ലിവർ, വയർലെസ് ഫോൺ ചാർജർ എന്നിവ ഉൾപ്പെടുന്നു. എസ്‌യുവിക്ക് പനോരമിക് സൺറൂഫും ലഭിക്കുന്നു, അത് ഉയർന്ന ട്രിമ്മുകൾക്കായി നീക്കിവയ്ക്കാൻ സാധ്യതയുണ്ട്. മധ്യനിരയിൽ ഒരു ബെഞ്ച് സീറ്റ് ഫീച്ചർ ചെയ്യുന്ന എക്സ്‍ട്രെയിൽ മൂന്നുവരി പതിപ്പ് ഇന്ത്യയിലേക്ക് കൊണ്ടുവരുമെന്നും ടീസർ സ്ഥിരീകരിക്കുന്നു.
ഇന്ത്യയിൽ, നിസ്സാൻ എക്സ്-ട്രെയിൽ ഒരു സിംഗിൾ 1.5L ടർബോ പെട്രോൾ എഞ്ചിനും 8-സ്പീഡ് സിവിടി ഗിയർബോക്സും നൽകും. ഗ്യാസോലിൻ യൂണിറ്റ് 2WD സജ്ജീകരണത്തോടൊപ്പം 163PS/300Nm-ഉം AWD സജ്ജീകരണത്തോടെ 213PS/523Nm-ഉം നൽകുന്നു. 2WD പതിപ്പ് 9.6 സെക്കൻഡിനുള്ളിൽ 0-ൽ നിന്ന് 100 കി.മീ/മണിക്കൂർ വേഗത കൈവരിക്കുകയും മണിക്കൂറിൽ 200 കി.മീ വേഗത നൽകുകയും ചെയ്യും. 4WD വേരിയൻ്റാകട്ടെ, 7 സെക്കൻഡിനുള്ളിൽ 0 മുതൽ 100 km/h വേഗത കൈവരിക്കും, അതേസമയം പരമാവധി വേഗത 180 km/h. ഇ-പവർ ഹൈബ്രിഡ് പവർട്രെയിൻ ഓപ്ഷൻ ഉണ്ടാകില്ല.
10-സ്പീക്കർ ബോസ് സൗണ്ട് സിസ്റ്റം, മെമ്മറി ഫംഗ്‌ഷനോടുകൂടിയ ഹീറ്റഡ്, പവർഡ് ഫ്രണ്ട് സീറ്റുകൾ, ത്രീ-സോൺ ക്ലൈമറ്റ് കൺട്രോൾ, 360-ഡിഗ്രി ക്യാമറ തുടങ്ങിയ സവിശേഷതകളും എക്സ്-ട്രെയിൽ എസ്‌യുവിയിൽ ഉൾപ്പെടുത്താം. ആഗോള-സ്പെക്ക് പതിപ്പിന് സമാനമായി, ഇന്ത്യയിൽ വരുന്ന മോഡലും അഡ്വാൻസ്ഡ് ഡ്രൈവർ അസിസ്റ്റൻസ് സിസ്റ്റം സാങ്കേതികതയോടെയാണ് വരുന്നത്. സ്‌കോഡ കൊഡിയാക്, എംജി ഗ്ലോസ്റ്റർ, ജീപ്പ് മെറിഡിയൻ തുടങ്ങിയ എതിരാളികൾക്ക് എതിരെയായിരിക്കും നിസാൻ എക്സ്-ട്രെയിൽ മത്സരിക്കുക. ഈ വാഹനത്തിന്‍റെ വില 40 ലക്ഷം രൂപയിൽ നിന്ന് ആരംഭിക്കുമെന്ന് പ്രതീക്ഷിക്കുന്നു.
