റിയാദ്: മദീനയിലെ അമീർ മുഹമ്മദ് ബിൻ അബ്ദുൽ അസീസ് അന്താരാഷ്ട്ര വിമാനത്താവളത്തിൽ വിമാനത്തിൽ നിന്ന് ഇറങ്ങുന്നതിനിടെ വഴുതിവീണ് യാത്രക്കാരി മരിച്ചു. ലയൺ എയർ വിമാനത്തിലെ യാത്രക്കാരിയാണ് മരിച്ചത്.
ഗുരുതരമായി പരിക്കേറ്റ അവരെ ഉടൻ ആശുപത്രിയിലെത്തിച്ചെങ്കിലും മരിച്ചു. ലയൺ എയറിെൻറ എ-330 വിമാനത്തിൽ നടന്ന അപകടത്തെക്കുറിച്ച് വിവരം ലഭിച്ചതായി നാഷനൽ സേഫ്റ്റി സെൻറർ ചൊവ്വാഴ്ച പ്രസ്താവനയിൽ പറഞ്ഞു. വിമാനത്തിൽ നിന്ന് ഇറങ്ങുന്നതിനിടെ സ്റ്റെപ്പ് ലാഡറില്‍ നിന്ന് വീഴുകയായിരുന്നു.
Also Read : ആശ്വാസമായി.. യുഎഇ പൊതുമാപ്പ് കാലാവധി നീട്ടി
വിമാനത്തിൽ നിന്നും വീണ ഉടനെ തന്നെ നാഷനൽ ട്രാൻസ്‌പോർട്ടേഷൻ സേഫ്റ്റി സെൻററിൽനിന്നുള്ള പ്രത്യേക സംഘങ്ങൾ അപകടസ്ഥലത്തെത്തി. സാഹചര്യങ്ങൾ അറിയുന്നതിനും കാരണങ്ങൾ നിർണയിക്കുന്നതിനും ആവശ്യമായ അന്വേഷണ നടപടിക്രമങ്ങൾ ആരംഭിച്ചിട്ടുണ്ട്. ബന്ധപ്പെട്ട അധികാരികളുമായി ഏകോപിപ്പിച്ച് ആവശ്യമായ ശിപാർശകൾ കേന്ദ്രം നൽകുമെന്നും പ്രസ്താവനയിൽ പറഞ്ഞു. മദീന വിമാനത്താവളത്തിൽ ഇറങ്ങുകയായിരുന്ന എൽ.എൻ 074 നമ്പർ വിമാനത്തിലാണ് സംഭവം.
