അടിമാലി: പോലീസ് പിടിക്കാനെത്തിയപ്പോൾ വാക്കത്തി വീശിയ പ്രതിയെ കുരുമുളക് സ്പ്രേ ചെയ്ത് പോലീസ് അറസ്റ്റ് ചെയ്തു. വെട്ടുകേസ് പ്രതിയെയാണ് പോലീസ് സാഹസികമായി കീഴ്പ്പെടുത്തിയത്. ഒഴുവത്തടം ട്രൈബൽ സെറ്റിൽമെന്റിലെ ജോമോനെയാണ് അടിമാലി സി.ഐ പ്രിൻസ് ജോസഫിൻ്റെ നേതൃത്വത്തിൽ പിടികൂടിയത്.
ഒഴുവത്തടം തടത്തിൽ ജോസഫ് മാത്യു(30)നെ വെട്ടി പരിക്കേൽപ്പിച്ച കേസിലെ പ്രതിയാണ് ജോമോന്‍. അടിമാലി പോലീസ് ജോമോന്റെ വീട്ടിലെത്തിയപ്പോൾ പോലീസിന് നേരെ വാക്കത്തി എടുത്ത് വീശുകയായിരുന്നു. രക്ഷപ്പെടാൻ ശ്രമിച്ച ജോമോനെ പൊലീസ് കുരുമുളക് സ്പ്രേ പ്രയോഗിച്ചാണ് അറസ്റ്റ് ചെയ്തത്.
Also Read: ഓട്ടോ മറിഞ്ഞ് അപകടം; കാണാതായ യാത്രക്കാരന്റെ മൃതദേഹം കണ്ടെത്തി
ജോമോന്‍ നിരവധി കേസുകളിൽ പ്രതിയാണ്. വീട്ടിൽ നിർത്തിയിട്ട വാഹനങ്ങൾ കേടുവരുത്തിയ സംഭവങ്ങളിലും സ്ത്രീകൾ മാത്രമുള്ള വീടുകളിൽ കയറി ശല്യപ്പെടുത്തിയ സംഭവങ്ങളിലും ഇയാൾ പ്രതിയാണ്. കൂടാതെ വനം, എക്സൈസ് വകുപ്പുകളിലും ഇയാൾക്കെതിരെ കേസുകളുണ്ടെന്നും അടിമാലി പോലീസ് പറഞ്ഞു.
