പത്തനംതിട്ട: യുഡിഎഫ് സ്ഥാനാർത്ഥി രാഹുൽ മാങ്കൂട്ടത്തിലിന്റെ വീഡിയോ സിപിഎം പത്തനംതിട്ട ജില്ലാ കമ്മിറ്റിയുടെ ഔദ്യോഗിക ഫെയ്സ്ബുക്ക് പേജിൽ വന്നതിൽ വിശദീകരണവുമായി സിപിഎം ജില്ലാ സെക്രട്ടറി കെ.പി ഉദയഭാനു. മന:പൂർവം വിവാദം സൃഷ്ടിക്കാനായി പേജ് ഹാക്ക് ചെയ്ത്, വിഡിയോ പോസ്റ്റ്‌ ചെയ്ത ശേഷം അതിന്റെ സ്ക്രീൻ റെക്കോർഡ് മാധ്യമങ്ങൾക്ക്‌ കൈമാറിയതായാണ് ഉദയഭാനു പറയുന്നത്.
ഉദയഭാനു പറഞ്ഞത്
‘പാലക്കാട് എന്ന സ്‌നേഹവിസ്മയം’ എന്ന കുറിപ്പോടെയാണ് രാഹുലിന്റെ പ്രചാരണവിഡിയോ പേജില്‍ പ്രത്യക്ഷപ്പെട്ടത്. രാത്രി തന്നെ പേജില്‍ നിന്ന് ദൃശ്യങ്ങള്‍ ഒഴിവാക്കി. പേജ് വ്യാജമാണെന്ന് ആദ്യം വിശദീകരണം നടത്തിയ ഉദയഭാനു ഇപ്പോൾ പറയുന്നത് പേജ് ഹാക്ക് ചെയ്യപ്പെട്ടതാണെന്നാണ്. സോഷ്യൽ മീഡിയ ടീം പേജിന്റെ നിയന്ത്രണം തിരിച്ചെടുത്ത് വിഡിയോ നീക്കം ചെയ്തുവെന്നും സൈബർ പൊലീസിനും ഫേസ്ബുക്കിനും പരാതി നൽകുകയും ചെയ്തിട്ടുണ്ടെന്ന് ഉദയഭാനു പറഞ്ഞു.
Also Read:ഉപതെരഞ്ഞെടുപ്പില്‍ പിന്തുണ യുഡിഎഫിന്: എസ്ഡിപിഐ
‘അടൂർ അസംബ്ലി മണ്ഡലത്തിലെ 119-ാം നമ്പർ ബൂത്തിലെ താമസക്കാരനാണ് വ്യാജൻ. (പെരിങ്ങനാട് വില്ലേജ്) കഴിഞ്ഞ അസംബ്ലി തെരഞ്ഞെടുപ്പിൽ എൽ ഡി ഫിന് 111 വോട്ടിൻ്റെയും പാർലമെൻ്റ് തെരഞ്ഞെടുപ്പിൽ എൽ ഡി ഫിന് 70 വോട്ടിൻ്റെയും ലീഡ് ഈ ബൂത്തിൽ ഉണ്ടായി. നാട്ടിൽ ജനങ്ങൾക്കിടയിൽ ഒരു സ്വാധീനവും ഇല്ലാത്ത വ്യാജൻ നാടൊട്ടുക്കുള്ള ആളുകളുടെ പേരിൽ വ്യാജ തിരിച്ചറിയൽ കാർഡ് നിർമ്മിച്ച്‌, ആ ആനൂകൂല്യത്തിൽ നേതൃസ്ഥാനത്തെത്തിയ ആളാണ്. അടൂർ, പന്തളം മേഖലകളിലെ ജനങ്ങളുടെ പേരിൽ പോലും ഇക്കൂട്ടർ വ്യാജ തിരിച്ചറിയൽ കാർഡ് നിർമ്മിച്ച്‌ ദുരുപയോഗം ചെയ്തതിന് നിയമനടപടികളും നേരിടുന്നുണ്ട്‌. ‘വ്യാജൻ ഇപ്പോൾ ഹാക്കറുമായി’ എന്ന തലക്കെട്ടിൽ ഫേസ്ബുക്കിൽ ഉദയഭാനു എഴുതിയ കുറിപ്പിൽ പറയുന്നു.
വ്യാജ ഐ ഡി കാർഡ് ഉണ്ടാക്കി സംഘടനാ തിരഞ്ഞെടുപ്പിനെ അട്ടിമറിച്ചവൻ ഉപതെരഞ്ഞെടുപ്പിന് മുൻപ് ഇനിയും പല തട്ടിപ്പുകളും നടത്തും എന്ന കാര്യത്തിൽ ഒരു സംശയവും വേണ്ട. പാലക്കാട്ടെ ജനങ്ങൾ ഇത് തിരിച്ചറിഞ്ഞ് ഇടതുപക്ഷ ജനാധിപത്യ മുന്നണി സ്ഥാനാർത്ഥിയായ ഡോ.പി. സരിനെ വിജയിപ്പിക്കണമെന്ന് അഭ്യർത്ഥിക്കുന്നു’’ എന്നും ഉദയഭാനു കൂട്ടിച്ചേർത്തു.
