ഈസ്ട്രജന്‍ എന്നത് സ്ത്രീ ഹോര്‍മോണാണ്. സ്ത്രീയില്‍ പ്രത്യുല്‍പാദനപരമായ പല കര്‍മങ്ങളും നിര്‍വഹിയ്ക്കുന്നതിന് പുറമേ ചര്‍മത്തില്‍ ചുളിവുകള്‍ വീഴാതെ തടയുന്നത്, ഹൃദയാരോഗ്യം സംരക്ഷിയ്ക്കുന്നത്, എല്ലുകളുടെ ആരോഗ്യം തുടങ്ങിയ ഒരു പിടി ഗുണങ്ങള്‍ നല്‍കുന്ന ഒന്നാണ് ഈസ്ട്രജന്‍ ഹോര്‍മോണ്‍. സ്ത്രീയിലെ ആര്‍ത്തവ, ഓവുലേഷന്‍ പ്രക്രിയകള്‍ക്ക് ഏറെ പ്രധാനപ്പെട്ട ഒന്ന്. മെനോപോസ് അഥവാ ആര്‍ത്തവ വിരാമത്തിനോട് അനുബന്ധിച്ച് ഈസ്ട്രജന്‍ ഹോര്‍മോണ്‍ ഉല്‍പാദനം തീരെ കുറയുന്നു. ഇത് ശാരീരികമായ പല ബുദ്ധിമുട്ടുകളും സ്ത്രീകള്‍ക്കുണ്ടാക്കും. ചര്‍മത്തിന്റെ ഇലാസ്റ്റിസിറ്റി കുറയുന്നതും ചര്‍മം അയഞ്ഞ് തൂങ്ങുന്നതും ഇതു കാരണമുണ്ടാകുന്നു. ഇതിനാല്‍ തന്നെയും പല സ്ത്രീകളും ഹോര്‍മോണ്‍ ട്രീറ്റ്മെന്റുകള്‍ ചെയ്യുന്നത് പതിവാണ്. ഇതിനായുള്ള പല മരുന്നുകളും ഡോക്ടറുടെ നിര്‍ദേശ പ്രകാരമില്ലാതെ കഴിയ്ക്കുന്നവരുമുണ്ട്. എന്നാല്‍ ഇത്തരം ഹോര്‍മോണ്‍ ട്രീറ്റ്മെന്റുകള്‍ക്ക് പല പാര്‍ശ്വ ഫലങ്ങളുമുണ്ട്. ബ്രെസ്റ്റ്ക്യാന്‍സര്‍ പല ആരോഗ്യ പ്രശ്നങ്ങള്‍ക്കും ഇത് വഴിയൊരുക്കുന്നുണ്ടെന്നാണ് മെഡിക്കല്‍ സയന്‍സ് വിശദീകരണം. ഇതിനാല്‍ തന്നെയും ഇത്തരം ട്രീറ്റ്മെന്റുകള്‍ വളരെ ശ്രദ്ധയോടെ മാത്രം ചെയ്യാവുന്ന ഒന്നാണ്. ഈസ്ട്രജന്‍ ഉല്‍പാദനം വർധിപ്പിക്കാനുള്ള മറ്റൊരു വഴിയാണ് ഭക്ഷണങ്ങള്‍. ചില പ്രത്യേക ഭക്ഷണ വസ്തുക്കള്‍ ഈസ്ട്രജന്‍ ഉല്‍പാദന വര്‍ദ്ധനവിന് ഏറെ ഗുണകരമാണ്.
ഫ്ളാക്സ് സീഡുകള്‍ അഥവാ ചണവിത്തുകള്‍ പ്രമേഹത്തിന് നല്ല പരിഹാരമമായി നാം പറഞ്ഞ് കേള്‍ക്കാറുണ്ട്. എന്നാല്‍ ഇത് മറ്റ് പല ആരോഗ്യ ഗുണങ്ങളും നല്‍കുന്ന ഒന്നാണ്. ഇതില്‍ ഒന്നാണ് ഈസ്ട്രജന്‍ ഉത്പാദനം. ഇതിലെ ലിഗ്‌നന്‍ എന്ന വസ്തു പോളി ഈസ്ട്രജന്‍ സമ്പുഷ്ടമാണ്. ഇതിന് മറ്റ് സസ്യ ഭക്ഷണങ്ങളേക്കാള്‍ 800 മടങ്ങ് കൂടുതല്‍ ലിഗ്‌നന്‍ സാന്നിധ്യമുണ്ട്. സ്ത്രീകളില്‍ ബ്രെസ്ററ് ക്യാന്‍സര്‍ സാധ്യത കുറയ്ക്കാന്‍ സാധിയ്ക്കുന്ന ഒന്നു കൂടിയാണ് ഫ്ളാക്സ് സീഡുകള്‍. പ്രത്യേകിച്ചും മെനോപോസ് ശേഷമുള്ള ബ്രെസ്റ്റ് ക്യാന്‍സര്‍ സാധ്യത കുറയ്ക്കാന്‍ സഹായിക്കുന്നു. എള്ള് ഈസ്ട്രജന്‍ സമ്പുഷ്ടമാണ്. ഇതിലും പോളി ഈസ്ട്രജനുകള്‍ ധാരാളം അടങ്ങിയിട്ടുണ്ട്. എള്ളിന് സ്ത്രീകളിലെ ആര്‍ത്തവ സംബന്ധമായ പ്രശ്നങ്ങള്‍ പരിഹരിയ്ക്കാനും കഴിവുണ്ട്. ഇതു പോലെ തന്നെ നട്സ് പോലുള്ളവയും ഇത്തരത്തിലെ ഗുണം നല്‍കുന്ന ഒന്നാണ്. ഇതിലും ധാരാളം ഈസ്ട്രജന്‍ അടങ്ങിയിട്ടുണ്ട്. സ്ത്രീകളില്‍ സ്വാഭാവിക ഈസ്ട്രജന്‍ വര്‍ദ്ധിപ്പിയ്ക്കാന്‍ സഹായിക്കുന്ന മറ്റൊന്നാണ് മത്തി പോലുള്ള മീനുകള്‍.
ഈസ്ട്രജന്‍ വര്‍ദ്ധനവിന് സഹായിക്കുന്നവയാണ് വെളുത്തുള്ളി, പീച്ച്, ബെറി, കോളിഫ്ളവര്‍, ക്യാബേജ് പോലുള്ള പലതും. സോയാബീനുകള്‍ ഇതിന്റെ പ്രധാന ഉറവിടമാണ്. ഉലുവയും ഇത്തരത്തിലെ ഈസ്ട്രജന്‍ സമ്പുഷ്ടമായ ഭക്ഷണ വസ്തുവാണ്. ഹോര്‍മോണ്‍ അസന്തുലിതാവസ്ഥ ഒഴിവാക്കാന്‍ വേണ്ട ചില അടിസ്ഥാന കാര്യങ്ങളുമുണ്ട്. ഇതില്‍ നമ്മുടെ ജീവിത ശൈലികള്‍ പ്രധാനമാണ്. ആവശ്യത്തിന് ഉറക്കം, വ്യായാമം, ചിട്ടയായ ജീവിതരീതി ഇതെല്ലാം ഹോര്‍മോണ്‍ പ്രശ്നങ്ങള്‍ അകറ്റാന്‍ സഹായിക്കുന്നു. സ്ട്രെസ് പോലുള്ളവ ഒഴിവാക്കുക. ഇത് ഹോര്‍മോണ്‍ പ്രശ്നങ്ങള്‍ക്ക് കാരണമാകും. ഇതു പോലെ തന്നെ മദ്യപാന, പുകവലി ശീലങ്ങള്‍ ഒന്നും നല്ലതല്ല. തൈറോയ്ഡ് പോലുള്ള ചില രോഗങ്ങളും ഹോര്‍മോണ്‍ പ്രശ്നങ്ങളുണ്ടാക്കാം. ഇത്തരം പ്രശ്നങ്ങള്‍ക്ക് ചികിത്സ അത്യാവശ്യമാണ്.
