കാണ്‍പൂര്‍: ഉത്തര്‍പ്രദേശില്‍ പ്രായപൂര്‍ത്തിയാകാത്ത പെണ്‍കുട്ടകളെ പീഡിപ്പിച്ച സര്‍ക്കാര്‍ സ്‌കൂള്‍ പ്രിന്‍സിപ്പലിനെ പൊലീസ് അറസ്റ്റ് ചെയ്തു. ഉത്തര്‍പ്രദേശിലെ ബുലന്ദ്ഷഹര്‍ ജില്ലയിലെ സര്‍ക്കാര്‍ പ്രൈമറി സ്‌കൂളിലാണ് പ്രിന്‍സിപ്പല്‍ വിദ്യാര്‍ത്ഥിനികളെ ലൈംഗിക പീഡനത്തിന് ഇരയാക്കിയത്. വിദ്യാര്‍ത്ഥിനികളുടെ മാതാപിതാക്കള്‍ നല്‍കിയ പരാതിയിലാണ് പ്രിന്‍സിപ്പല്‍ പ്രതാപ് സിംഗിനെ പൊലീസ് അറസ്റ്റ് ചെയ്തത്.
നാളുകളായി വിദ്യാര്‍ത്ഥിനികളെ ലൈംഗിക ചൂഷണത്തിന് ഇരയാക്കിയതായാണ് പൊലീസ് പറയുന്നത്. കുട്ടികളുടെ ശരീരഭാഗങ്ങളില്‍ തൊടുകയും അശ്ലീല വര്‍ത്തമാനം പറയുകയും ചെയ്തിരുന്നതായി പരാതിയില്‍ ആരോപിക്കുന്നു. പീഡിപ്പിച്ച ശേഷം വിവരം പുറത്ത് പറഞ്ഞാല്‍ സ്‌കൂളില്‍ നിന്നും പിരിച്ചുവിടുമെന്നും എതിര്‍ത്താല്‍ പരീക്ഷയില്‍ തോല്‍പ്പിക്കുമെന്ന് ഭീഷണിപ്പെടുത്തിയിരുന്നതായും വിദ്യാര്‍ത്ഥിനികള്‍ പൊലീസിന് മൊഴി നല്‍കിയിട്ടുണ്ട്. ഒമ്പതിനും പന്ത്രണ്ടിനും ഇടയില്‍ പ്രായമുള്ള പെണ്‍കുട്ടികളാണ് പ്രിന്‍സിപ്പലിന്റെ പീഡനത്തിന് ഇരയായത്. കുട്ടികള്‍ പേടിച്ച് സ്‌കൂളില്‍ പോകാതിരുന്നതോടെയാണ് വിവരം പുറത്തറിയുന്നത്.
പ്രതാപ് സിംഗിനെതിരെ പോക്‌സോ വകുപ്പ് ചുമത്തിയാണ് അര്‍ണിയ പൊലീസ് കേസെടുത്തിട്ടുള്ളത്. സംഭവത്തില്‍ വിശദമായ അന്വേഷണം നടക്കുന്നുണ്ടെന്നും മറ്റ് പെണ്‍കുട്ടികളെ പ്രതി ലൈംഗിക ചൂഷണത്തിന് ഇരയാക്കിയിട്ടുണ്ടോ എന്നത് പരിശോധിച്ച് വരികയാണെന്ന് പൊലീസ് സൂപ്രണ്ട് രോഹിത് മിശ്ര പറഞ്ഞു.
