തൃശൂര്: തൃശൂര് ടൈറ്റന്സ് കേരള ക്രിക്കറ്റ് അസോസിയേഷന് സംഘടിപ്പിക്കുന്ന പ്രഥമ കേരള ക്രിക്കറ്റ് ലീഗിന് ഒരുങ്ങി. തൃശൂര് അത്രേയ ക്രിക്കറ്റ് അക്കാദമിയില് വച്ച് നടന്ന പ്രൗഢ ഗംഭീരമായ ചടങ്ങില് ടൈറ്റന്സിന്റെ പരിശീലകനും മുന് കേരള ക്രിക്കറ്റ് ടീം ക്യാപ്റ്റനുമായ സുനില് ഒയാസിസ്, ടീമംഗം വരുണ് നായനാര് എന്നിവരുടെ സാന്നിധ്യത്തില് ചലച്ചിത്രതാരം ദേവ് മോഹന്, ടൈറ്റന്സ് ടീം ഉടമ സജ്ജാദ് സേട്ട് എന്നിവര് ചേര്ന്ന് ടീമിന്റെ ജഴ്സി പുറത്തിറക്കി. ചടങ്ങില് തൃശൂര് ടൈറ്റന്സിന്റെ ക്യാപ്പ്റ്റനായി വരുണ് നായനാരെ പ്രഖ്യാപിച്ചു.
‘ഞങ്ങള് തൃശൂര് ടൈറ്റന്സ്’ എന്ന ടീം ആന്തം ടൈറ്റന്സ് ടീം സിഇഒ ശ്രീജിത്ത് രാജന് പുറത്തിറക്കി. പ്രശസ്ത ചലച്ചിത്ര ഗാനരചയിതാവായ ബി കെ ഹരിനാരായണന് രചിച്ച ആന്തത്തിന് സംഗീതം നല്കിയിരിക്കുന്നത് നിരഞ്ജ് സുരേഷാണ്. സച്ചിന് വാര്യറും നിരഞ്ജ് സുരേഷും ചേര്ന്നാണ് ആന്തം സോങ്ങ് ആലപിച്ചിരിക്കുന്നത്.
തൃശൂരിന്റെ സ്വന്തം പൂരത്തില് നിന്നും അതിന്റെ പീതവര്ണത്തില് നിന്നും സമൃദ്ധമായ പ്രകൃതിയുടെ പച്ചപ്പില് നിന്നും പ്രേരണ ഉള്ക്കൊണ്ടാണ് ടൈറ്റന്സിന്റെ ജഴ്സി ഡിസൈന് ചെയ്തിരിക്കുന്നത്. ഉത്സവനഗരിയായ തൃശൂരിനും ദൈവത്തിന്റെ സ്വന്തം നാടായ നമ്മുടെ കേരളത്തിന്റെ പ്രകൃതിമനോഹാരിതയ്ക്കുമുള്ള സമര്പ്പണമാണ് ജഴ്സിയുടെ രൂപകല്പ്പനയെന്ന് ടീം ഉടമ സജ്ജാദ് സേട്ട് പറഞ്ഞു.
‘ക്രിക്കറ്റുമായി ഞങ്ങള്ക്ക് തുടക്കം മുതലേ ഒരു ആത്മബന്ധമുണ്ടായിരുന്നു. കേരള ക്രിക്കറ്റ് അസോസിയേഷന്റെ ആഭിമുഖ്യത്തില് നടക്കുന്ന കേരള ക്രിക്കറ്റ് ലീഗ് കളിക്കാര്ക്ക് വളരെ ശോഭനമായ ക്രിക്കറ്റിങ് ഭാവി സ്വപ്നം കാണാനുള്ളൊരു മികച്ച അവസരമാണ്. അതിന് പുറമേ കേരളത്തില് ക്രിക്കറ്റ് കളിയുടെ നിലവാരം ഉയര്ത്താനുള്ള ശ്രമങ്ങളില് സഹായിക്കാന് കഴിയുന്നതിലൂടെ മുന് കളിക്കാരെന്ന നിലയില് ഈ കായികയിനത്തിന് എന്തെങ്കിലും തിരിച്ചുനല്കാനുള്ള അവസരമാണ് ഞങ്ങള്ക്ക് ലഭിച്ചിരിക്കുന്നത്. ഭാവിയില് കേരളത്തില് നിന്നുള്ള കൂടുതല് കളിക്കാര് ടെസ്റ്റ് മത്സരങ്ങളിലും, ട്വന്റി ട്വന്റി മത്സരങ്ങളിലും ഇന്ത്യന് ജേഴ്സി അണിയുകയും ഐപിഎല് ടീമുകളില് ഇടം നേടുകയും ചെയ്യുമെന്നതില് എനിക്ക് ആത്മവിശ്വാസമുണ്ട്’, സജ്ജാദ് സേട്ട് പറഞ്ഞു.