ഡല്ഹി: പ്രധാനമന്ത്രി നരേന്ദ്ര മോദിയെ തിരഞ്ഞെടുപ്പില് നിന്ന് വിലക്കണമെന്ന ഹര്ജി ഹൈക്കോടതി ഇന്ന് പരിഗണിക്കും. മതത്തിന്റെ പേരില് പ്രധാനമന്ത്രി വോട്ട് തേടിയെന്നും അതുകൊണ്ട് തെരഞ്ഞെടുപ്പില് നിന്ന് വിലക്കണമെന്നുമാണ് ഹര്ജിക്കാരുടെ ആവശ്യം. രാജസ്ഥാനിലെ ബന്സ്വാരയില് തിരഞ്ഞെടുപ്പ് പ്രചാരണ റാലിയില് മുസ്ലിം സമുദായത്തിനെതിരെ പ്രധാനമന്ത്രി നടത്തിയ പരാമര്ശങ്ങളാണ് ഹര്ജിയില് ചൂണ്ടികാട്ടിയിട്ടുള്ളത്.
അതേസമയം രാജസ്ഥാന് പ്രസംഗത്തിന്റെ പേരില് പ്രധാനമന്ത്രി വിദ്വേഷ പ്രസംഗം നടത്തിയെന്ന പരാതിയില് നേരത്തെ തിരഞ്ഞെടുപ്പ് കമ്മീഷന് വിശദീകരണം തേടിയിരുന്നു. തിരഞ്ഞെടുപ്പ് കമ്മീഷന് കോണ്ഗ്രസ് നല്കിയ പരാതിയില് മുസ്ലിങ്ങളെ കൂടുതല് കുട്ടികളുണ്ടാകുന്ന വിഭാഗമെന്നും നുഴഞ്ഞു കയറ്റക്കാര് എന്നും പ്രധാനമന്ത്രി അധിക്ഷേപിച്ചതായി ചൂണ്ടിക്കാട്ടിയിരുന്നു. ബി ജെ പി ദേശീയ അധ്യക്ഷന് ജെ പി നദ്ദയോടാണ് തിരഞ്ഞെടുപ്പ് കമ്മീഷന് വിശദീകരണം ആവശ്യപ്പെട്ടത്. തിങ്കളാഴ്ച രാവിലെ 11 മണിക്കുള്ളില് വിശദീകരണം നല്കാനാണ് കമ്മീഷന് ആവശ്യപ്പെട്ടിരിക്കുന്നത്.