‘ടോവിനോ തോമസ് പ്രധാന വേഷത്തിലെത്തിയ ഫാന്റസി ചിത്രമാണ് ‘അജയന്റെ രണ്ടാം മോഷണം’. സിനിമയിൽ പ്രധാന കഥാപാത്രമായെത്തിയ കൃതി ഷെട്ടിക്കുവേണ്ടി ശബ്ദം നൽകിയത് മമിത ബൈജുവാണ്. എന്നാൽ ഈ കാര്യം സിനിമ ഇറങ്ങിയശേഷമാണ് താനറിഞ്ഞതെന്ന് ടൊവിനോ തോമസ്. മമിത ബൈജുവിനോട് നന്ദി പറഞ്ഞ് സന്ദേശമയച്ചെന്നും ടൊവിനോ പറഞ്ഞു. സിനിമയിൽ അഭിനയിച്ചില്ലെങ്കിലും മമിത ചിത്രത്തിന്റെ ഭാഗമാണെന്ന് വെളിപ്പെടുത്തുകയാണ് ചിത്രത്തിന്റെ പ്രൊമോഷന്റെ ഭാഗമായി നൽകിയ അഭിമുഖത്തിലൂടെ ടൊവിനോ തോമസ്. കൃതിയുടെ കഥാപാത്രത്തെ മികച്ചതാക്കിയതിൽ മമിതയുടെ ശബ്ദത്തിന് വലിയ പങ്കുണ്ടെന്നും ടൊവിനോ പറയുന്നു. യെസ് എഡിറ്റോറിയലിനു നൽകിയ അഭിമുഖത്തിലായിരുന്നു ടൊവിനോ ഇക്കാര്യം പറഞ്ഞത്.
ടൊവിനോ തോമസിന്റെ വാക്കുകൾ
‘’കൃതിയുടെ കഥാപാത്രത്തിന് ഡബ്ബ് ചെയ്തതത് മമിതയാണെന്ന് ഞാൻ അറിയുന്നത് ഈ അടുത്താണ്. അപ്പോൾ തന്നെ മമിതക്ക് മെസ്സേജ് അയച്ചു, കലക്കിയെന്നു പറഞ്ഞു. കൃതിയുടെ കഥാപാത്രത്തെ കൂടുതൽ മികച്ചതാക്കാൻ മമിതയുടെ ശബ്ദം സഹായിച്ചിട്ടുണ്ട്. അടിപൊളിയായി, നിങ്ങളും ഈ സിനിമയുടെ ഭാഗമാണെന്ന് പറഞ്ഞാണ് ഞാൻ മെസ്സേജ് ചെയ്തത്. മമിതയോട് നന്ദിയും പറഞ്ഞു.’’
ടോവിനോ തോമസ് പ്രധാന വേഷത്തിലെത്തിയ ഫാന്റസി ചിത്രം ‘അജയന്റെ രണ്ടാം മോഷണം’ (എ ആർ എം) ഓണം റിലീസായാണ് എത്തിയത്. ടൊവിനോ തോമസ് മൂന്നു വേഷങ്ങളിലെത്തുന്ന ചിത്രം സംവിധാനം ചെയ്തിരിക്കുന്നത് ജിതിൻ ലാലാണ്. സുജിത് നമ്പ്യാരാണ് ചിത്രത്തിന് തിരക്കഥ ഒരുക്കുന്നത്. മലയാളം, ഹിന്ദി, ഇംഗ്ലീഷ്, തമിഴ്, തെലുങ്ക്, കന്നഡ എന്നിങ്ങനെ ആറു ഭാഷകളിലാണ് ചിത്രം തിയറ്ററുകളിലെത്തിയത്. ഏറെ കാലത്തിനുശേഷം മലയാളത്തിൽ റിലീസാവുന്ന ത്രീ ഡി സിനിമ എന്ന പ്രത്യേകതയും ചിത്രത്തിനുണ്ട്. ആക്ഷനു പ്രാധാന്യമുള്ള ചിത്രത്തിൽ മൂന്ന് തലമുറകളുടെ കഥയാണ് പറയുന്നത്.
കൃതി ഷെട്ടി, ഐശ്വര്യ രാജേഷ്, സുരഭി ലക്ഷ്മി എന്നിവരാണ് ചിത്രത്തിലെ നായികമാർ. മാജിക്ക് ഫ്രെയിംസ്, യു ജി എം മോഷൻ പിക്‌ചേഴ്‌സ് എന്നീ ബാനറുകളിൽ ലിസ്റ്റിൻ സ്റ്റീഫൻ, ഡോ. സക്കറിയ തോമസ് എന്നിവർ ചേർന്നാണ് ചിത്രം നിർമിച്ചിരിക്കുന്നത്.
