ന്യൂഡൽഹി: കാവടി യാത്രയുടെ ഭാഗമായി ഡൽഹിയിലെ മീററ്റ് എക്സ്പ്രസ്വേയിൽ കാറുകൾക്ക് അനുമതിയില്ല. കടുത്ത യാത്രാ നിയന്ത്രണങ്ങളാണ് ഡൽഹിയിലുള്ളത്. ഹരിദ്വാറിൽ നിന്നും വരുന്ന യാത്രികർ മീററ്റ്, ഗാസിയാബാദ്, നോയിഡ, ഡൽഹി, ഫരീദാബാദ് തുടങ്ങിയ സ്ഥലങ്ങളിലൂടെ സഞ്ചരിക്കും. ഇതിന് മുന്നോടിയായാണ് നിയന്ത്രണം ഏർപ്പെടുത്തിയത്.
യു.പി സർക്കാർ ഡൽഹി-മീററ്റ് എക്സ്പ്രസ് ഹൈവേയിൽ ഭാരവാഹനങ്ങൾക്ക് പൂർണ നിരോധനം ഏർപ്പെടുത്തി. ആഗസ്റ്റ് അഞ്ചിന് രാത്രി എട്ട് വരെയാണ് നിയന്ത്രണം. പാതയിൽ ജൂലൈ 29 മുതൽ സ്വകാര്യ കാറുകൾക്കും നിയന്ത്രണമുണ്ടാവും. നോയിയഡയിൽ ഓഖ്‍ല ബാരേജ് മുതൽ ഓഖ്‍ല ബേർഡ് സാങ്ച്ചുറി വരെയുള്ള ഭാഗത്തെ നാല് വരി പാതയിൽ രണ്ട് വരി കാവടി യാത്രികർക്കായി മാറ്റിവെച്ചിട്ടുണ്ട്. പ്രദേശത്ത് അധിക പൊലീസിനെ വിന്യസിച്ച് കൂടുതൽ ട്രാഫിക് നിയന്ത്രണങ്ങളും ഏർപ്പെടുത്തും. ജൂലൈ 28 മുതൽ ആഗസ്റ്റ് നാല് വരെയായിരെയാണ് നിയന്ത്രണം.
വിപുലമായ സൗകര്യങ്ങളാണ് കാവടി യാത്രയിൽ പങ്കെടുക്കുന്ന തീർഥാടകർക്കായി ഒരുക്കിയിട്ടുള്ളതെന്ന് ഡൽഹി മന്ത്രി അതിഷി അറിയിച്ചു.കശ്മീരിഗേറ്റിന് സമീപം 2,000 കാവടി തീർഥാടകർക്ക് താമസിക്കാനുള്ള സൗകര്യമാണ് ഒരുക്കിയിരിക്കുന്നത്.
