അടുത്ത സീസണിനു മുന്നോടിയായി താരങ്ങളെ സ്വന്തമാക്കാനുള്ള ശ്രമത്തിലാണ് ക്ലബ്ബുകൾ. റയൽ മാഡ്രിഡിൽ നിന്ന് മാഞ്ചസ്റ്റർ യുണൈറ്റഡിൽ എത്തിയ ബ്രസിൽ താരം കസെമിറോ ടീം വിടുമെന്നാണ് വിവിധ അന്താരാഷ്ട്ര മാധ്യമങ്ങൾ റിപ്പോർട്ട് ചെയ്യുന്നത്. വൻതുകക്ക് സൗദി പ്രോ ലീഗ് ക്ലബ്ബുകളായ അൽ നാസർ, അൽ അഹ്ലി, അൽ ഖാദിസിയ ക്ലബ്ബുകൾ താരത്തിന് വേണ്ടി കരുക്കൾ നീക്കുന്നതായി ഗോൾ-ബ്രസീൽ റിപ്പോർട്ട് ചെയ്തു.
അഷ്റഫ് ഹക്കീമിയെ തിരിച്ചെത്തിക്കാനുള്ള ശ്രമങ്ങൾ റയൽ മാഡ്രിഡ് തുടങ്ങിയതായും റിപ്പോർട്ടുണ്ട്. 2017 മുതൽ 2020 വരെ റയൽ മാഡ്രിഡിൽ കളിച്ചിരുന്ന ഹക്കീമി ഇപ്പോൾ പി.എസ്.ജി താരമാണ്. റയൽ മാഡ്രിഡിന് ശേഷം ബൊറൂസിയ ഡോർട്മുണ്ട്, ഇന്റർ മിലാൻ ക്ലബുകൾക്ക് വേണ്ടി കളിച്ചായിരുന്നു ഹകീമി പി.എസ്.ജിയിലെത്തിയത്. ഹക്കീമിയെ തിരിച്ചെത്തിക്കാൻ ചർച്ചകൾ നടക്കുന്നുണ്ടെന്നാണ് വിവരം.
പോർട്ടോ താരം അലാൻ വരേലക്ക് വേണ്ടി യൂറോപ്പിലെ മുന്ന് വമ്പൻമാരാണ് രംഗത്തുള്ളത്. താരത്തെ ടീമിലെത്തിക്കാൻ ലിവർപൂൾ പോർട്ടോയുമായി പ്രാഥമിക ചർച്ച നടത്തിയിട്ടുണ്ട്. എന്നാൽ ബയേൺ മ്യൂണിക്കും മാഞ്ചസ്റ്റർ സിറ്റിയും 22 കാരനായ മധ്യനിര താരത്തിനായി കഠിന ശ്രമങ്ങളുമായി രംഗത്തുണ്ട്.
ലീഡ്സ് യുനൈറ്റഡിന്റെ യുവ വിങ്ങർ ക്രിസൻസിയോ സമ്മർവില്ലയെ ടീമിലെത്തിക്കാൻ ചെൽസി പ്രാഥമിക നടപടികൾ നടത്തുന്നതായും റിപ്പോർട്ടുകളുണ്ട്.
