തൊടുപുഴ (ഇടുക്കി): ആലക്കോട് ചവർണയിൽ മദ്യസേവയ്ക്കിടെയുണ്ടായ തർക്കം കലാശിച്ചത് കത്തിക്കുത്തിൽ. ഒരുമിച്ച് മദ്യപിക്കുന്നതിനിടെ ബാക്കി വന്ന മദ്യത്തെ ചൊല്ലിയാണ് തർക്കമുണ്ടാകുന്നത്. തിങ്കളാഴ്ച വൈകീട്ടാണ് സംഭവം. ചവർണ കോളാപ്പിള്ളിൽ അഖിൽ ജയൻ, പൂക്കോളയിൽ ജിതിൻ ജോസഫ്, വെള്ളിലാംചോട്ടിൽ ഫൈസൽ എന്നിവർസംഘം ചേർന്ന് മദ്യപിക്കുന്നതിനിടെ ബാക്കിയുണ്ടായിരുന്ന മദ്യം ഫൈസൽ കൊണ്ടു പോകാൻ ശ്രമിച്ചതാണ് വാക്കേറ്റത്തിനിടയാക്കിയത്.
ഓട്ടോയിലുണ്ടായിരുന്ന മീൻ വെട്ടാനുപയോഗിക്കുന്ന കത്തികൊണ്ട് ഫൈസൽ ഇവരെ ആക്രമിക്കുകയായിരുന്നു. അഖിൽ ജയൻ, ജിതിൻ ജോസഫ് എന്നിവർക്ക് പരിക്കേറ്റു. പുറത്ത് ആഴത്തിൽ കുത്തേറ്റ അഖിലിനെ ആദ്യം തൊടുപുഴ ജില്ലാ ആശുപത്രിയിലും പിന്നീട് കോലഞ്ചേരിയിലെ ആശുപത്രിയിലും പ്രവേശിപ്പിച്ചു. പരിക്കേറ്റ ജിബിൻ തൊടുപുഴയിലെ സ്വകാര്യ ആശുപത്രിയിൽ ചികിൽസയിലാണ്. തൊടുപുഴ പോലീസ് കേസെടുത്തു. ഇവരെ കുത്തിയ ഫൈസൽ മൈതീനു വേണ്ടി പോലീസ് അന്വേഷണം ആരംഭിച്ചു.
