കൊല്‍ക്കത്ത: പശ്ചിമ ബംഗാളില്‍ തൃണമൂല്‍ കോണ്‍ഗ്രസ് പ്രവര്‍ത്തകന്‍ കൊല്ലപ്പെട്ടു. കിഴക്കന്‍ ബര്‍ദ്വാന്‍ ജില്ലയില്‍ ഇന്നലെ രാത്രിയാണ് സംഭവം. ബര്‍ദ്വാനിലെ കേതുഗ്രാമില്‍ മിന്റു ഷെയ്ഖ് (50) ആണ് കൊല്ലപ്പെട്ടത്. ഇന്നലെ രാത്രിയോടെ അജ്ഞാത അക്രമി സംഘം മിന്റുവിന്റെ വീടിന് നേരെ ബോംബാക്രമണം നടത്തി. പിന്നാലെ ആയുധങ്ങള്‍ ഉപയോഗിച്ച് കൊലപ്പെടുത്തുകയായിരുന്നു. സംഭവവുമായി ബന്ധപ്പെട്ട് രണ്ട് പേരെ ഇന്ന് രാവിലെ പൊലീസ് അറസ്റ്റുചെയ്തു. ഭുലന്‍ ഷെയ്ഖ്, സംസൂര്‍ ഷെയ്ഖ് എന്നിവരാണ് പിടിയിലായത്. കൊല്ലപ്പെട്ടയാളുടെ മൃതദേഹം പോസ്റ്റ്മോര്‍ട്ടത്തിന് അയച്ചെന്നും അന്വേഷണം നടക്കുകയാണെന്നും പൊലീസ് അറിയിച്ചു. ആക്രമണത്തില്‍ തിരഞ്ഞെടുപ്പ് കമ്മിഷന്‍ ജില്ലാ ഭരണകൂടത്തോട് റിപ്പോര്‍ട്ട് തേടിയിട്ടുണ്ട്.
കൊലപാതകത്തിന് പിന്നില്‍ സിപിഐഎം പ്രവര്‍ത്തകരാണെന്ന് തൃണമൂല്‍ കോണ്‍ഗ്രസ് ആരോപിച്ചു. എന്നാല്‍ ടിഎംസിയിലെ തന്നെ ചേരിപ്പോരിന്റെ ഇരയാണ് തന്റെ ഭര്‍ത്താവെന്ന് മിന്റു ഷെയ്ഖിന്റെ ഭാര്യ ആരോപിച്ചു. കൊലപാതകത്തില്‍ പ്രാദേശിക തൃണമൂല്‍ കോണ്‍ഗ്രസ് നേതാക്കള്‍ക്ക് പങ്കുണ്ടെന്നും തുഹിന ഖാത്തൂന്‍ പറഞ്ഞു. തിരഞ്ഞെടുപ്പില്‍ തോല്‍ക്കുമെന്ന് ഭയം സിപിഐഎമ്മിനുണ്ടെന്നും സജീവ പാര്‍ട്ടി പ്രവര്‍ത്തകനായിരുന്ന മിന്റുവിനെ ആസൂത്രിതമായി കൊലപ്പെടുത്തുകയായിരുന്നെന്നും ടിഎംസി വക്തമാവ് പ്രൊസെന്‍ജിത് ദാസ് ആരോപിച്ചു.
