ഇന്ത്യയില്‍ റേസിംഗിനായി ടിവിഎസ് വീണ്ടും തങ്ങളുടെ ഇലക്ട്രിക് സ്പോര്ട്സ് ബൈക്ക് അവതരിപ്പിച്ചു. അപ്പാച്ചെ ആര്‍ടിഇ എന്നാണ് ഈ ബൈക്കിന്റെ പേര്. മണിക്കൂറില്‍ 200 കിലോമീറ്ററിലധികം വേഗത കൈവരിക്കാന്‍ കഴിയുന്ന ഒരു ഇലക്ട്രിക് സ്പോര്ട്സ് ബൈക്കാണ് അപ്പാച്ചെ ആര്‍ടിഇ എന്നാണ് ടിവിഎസ് പറയുന്നത്. ഈ മോട്ടോര്‍സൈക്കിളിന്റെ പിന്‍ഭാഗവും വേറിട്ടതാണ്. ബാറ്ററി കെയ്സ് കൂടിയായ കാര്‍ബണ്‍ ഫൈബര്‍ ഷാസിയാണ് ഇതില്‍ ഉപയോഗിച്ചിരിക്കുന്നത്. അതിന്റെ സീറ്റ് ഒരു പൂര്‍ണ്ണ കാര്‍ബണ്‍ ഫൈബര്‍ യൂണിറ്റില്‍ സ്ഥാപിച്ചിരിക്കുന്നു. അതൊരു സബ്‌ഫ്രെയിം ആയി പ്രവര്‍ത്തിക്കുന്നു.
ഹൊസൂര്‍ ആസ്ഥാനമായുള്ള കമ്പനി ഓഹ്ലിന്‍സ് സസ്പെന്‍ഷന്‍, ബ്രെംബോ ബ്രേക്കിംഗ് സിസ്റ്റം തുടങ്ങിയ നിരവധി മുന്‍നിര ഘടകങ്ങളുമായി ആര്‍ടിഇ സജ്ജീകരിച്ചിരിക്കുന്നു. റോഡില്‍ മികച്ച ഗ്രിപ്പിനായി പിറെല്ലി സൂപ്പര്‍ കോര്‍സ ടയറുകള്‍ ഇതില്‍ ഉപയോഗിച്ചിട്ടുണ്ട്. കാര്‍ബണ്‍ ഫൈബര്‍ വീലുകളാണ് ഏറ്റവും ഉയര്‍ന്ന പവര്‍-ടു-വെയ്റ്റ് അനുപാതത്തില്‍ ഉപയോഗിച്ചിരിക്കുന്നത്. അപ്പാച്ചെ ആര്‍ടിഇയുടെ പ്രകടനത്തെ കുറിച്ച് പറയുകയാണെങ്കില്‍, ഈ ബൈക്ക് ഫുള്‍ ചാര്‍ജില്‍ ഏകദേശം 50 കിലോമീറ്റര്‍ റേഞ്ച് നല്‍കുന്നു. ഒന്നുമുതല്‍ രണ്ട് മണിക്കൂറിനകം ഇത് പൂര്‍ണ്ണമായി ചാര്‍ജ് ചെയ്യപ്പെടും. വണ്‍ മേക്ക് ചാമ്പ്യന്‍ഷിപ്പില്‍, ഈ ഇലക്ട്രിക് മോട്ടോര്‍സൈക്കിള്‍ ഒരുമിനിറ്റ് 48 സെക്കന്‍ഡില്‍ ഏറ്റവും വേഗത കൈവരിച്ചിരുന്നു. എങ്കിലും, ഈ ഇലക്ട്രിക് മോട്ടോര്‍സൈക്കിള്‍ വിപണിയില്‍ അവതരിപ്പിക്കാന്‍ ടിവിഎസിന് പദ്ധതിയില്ല എന്നാണ് റിപ്പോര്‍ട്ടുകള്‍.
അതേസമയം കമ്പനിയില്‍ നിന്നുള്ള മറ്റ് വാര്‍ത്തകള്‍ പരിശോധിച്ചാല്‍ ടിവിഎസ് മോട്ടോര്‍ കമ്പനി അതിന്റെ ജനപ്രിയ ജൂപ്പിറ്റര്‍ 110 സ്‌കൂട്ടറിന്റെ നവീകരിച്ച പതിപ്പ് വികസിപ്പിക്കുന്നതായി റിപ്പോര്‍ട്ടുകള്‍ ഉണ്ട്. ഈ പുതിയ മോഡല്‍ ഇപ്പോള്‍ മഹാരാഷ്ട്രയില്‍ പരീക്ഷണ ഘട്ടത്തിലാണെന്നും പുതിയ മോഡല്‍ അതിന്റെ മുന്‍ഗാമിയേക്കാള്‍ കൂടുതല്‍ സ്പോര്‍ട്ടിയറും കാഴ്ചയില്‍ ആകര്‍ഷകവുമാക്കുന്നതിന് കാര്യമായ സൗന്ദര്യാത്മക മെച്ചപ്പെടുത്തലുകള്‍ ലഭിക്കുമെന്നുമാണ് റിപ്പോര്‍ട്ടുകള്‍.
ഡിസൈനിന്റെ കാര്യത്തില്‍, പ്രാഥമിക അപ്ഡേറ്റുകളിലൊന്ന് പുനര്‍രൂപകല്‍പ്പന ചെയ്ത ടെയില്‍ ലൈറ്റ് ആയിരിക്കുമെന്ന് പ്രതീക്ഷിക്കുന്നു. സ്‌കൂട്ടറിന്റെ മൊത്തത്തിലുള്ള രൂപം വര്‍ദ്ധിപ്പിക്കുന്നതിന് ഒരു എല്‍ഇഡി സജ്ജീകരണം സംയോജിപ്പിക്കാന്‍ സാധ്യതയുണ്ട്. ഇതോടൊപ്പം, കൂടുതല്‍ ആധുനികമായ രൂപം നല്‍കുന്നതിനായി പുതിയ കളർ ഓപ്ഷനുകള്‍ അവതരിപ്പിക്കാന്‍ സാധ്യതയുണ്ട്.
