ദോഹ: അടുത്ത വർഷം ചൈനയിൽ നടക്കുന്ന അണ്ടർ 20 ഏഷ്യൻ കപ്പ് ഫുട്ബോളിൽ ഗ്രൂപ് റൗണ്ടിൽ ഖത്തറിന് ശക്തരായ എതിരാളികളാണ് ഉള്ളത്. ആസ്ട്രേലിയ ചൈന കിർഗിസ്ഥാൻ എന്നീ ടീമുകളാണ് ഖത്തറിന്റെ എതിരാളികൾ. കഴിഞ്ഞ ദിവസമാണ് 16 ടീമുകൾ പങ്കെടുക്കുന്ന ടൂർണമെന്റിന്റെ നറുക്കെടുപ്പ് നടന്നത്. ഗൾഫ് മേഖലയിൽനിന്ന് ഖത്തറും സൗദി അറേബ്യയും മാത്രമാണ് ഏഷ്യൻ കപ്പിന് യോഗ്യത നേടിയത്.
നാല് ഗ്രൂപ്പുകളിലായി നാല് ടീമുകൾ വീതമാണ് ടൂർണമെന്റിൽ പോരാടുന്നത്. 2025 ഫെബ്രുവരി 12 മുതൽ മാർച്ച് ഒന്നു വരെയാണ് ടൂർണമെന്റ് നടക്കുക. 2014ൽ ഏഷ്യൻ ചാമ്പ്യന്മാരായിരുന്ന ഖത്തറിന്റെ നിരയിൽ ഇത്തവണ മലയാളി താരം തഹ്സിൻ മുഹമ്മദുമുണ്ട്. ദേശീയ സീനിയർ ടീമിൽ ഖത്തറിനായി ബൂട്ടുകെട്ടിയ അനുഭവ സമ്പത്തുമായാണ് തഹ്സിൻ അണ്ടർ 20 ടീമിന്റെ മുന്നേറ്റ നിരയിൽ കളിക്കുന്നത്.
