ദുബൈ: കുട്ടികളിൽ അഞ്ചാംപനി പ്രതിരോധിക്കുന്നതിനായി യു.എ.ഇ ആരോഗ്യ -പ്രതിരോധ മന്ത്രാലയം ദേശീയതല വാക്സിൻ ബൂസ്റ്റർ ഡോസ് കാമ്പയിൻ പ്രഖ്യാപിച്ചു. ആഗോളതലത്തിൽ അഞ്ചാംപനി തിരിച്ചുവന്ന സാഹചര്യത്തിലാണ് ഏഴു വയസ്സുവരെയുള്ള കുട്ടികളെ കേന്ദ്രീകരിച്ച് വാക്സിൻ ബൂസ്റ്റർ ഡോസ് കാമ്പയിൻ സംഘടിപ്പിക്കുന്നത്.
ദേശീയ വാക്സിനേഷൻ പ്രോഗ്രാമിൽ നിലവിൽ രണ്ട് ഡോസ് വാക്സിനാണ് ഉൾപ്പെടുന്നത്. ആദ്യ ഡോസ് 12ാം മാസത്തിലും രണ്ടാമത്തേത് 18ാം മാസത്തിലുമാണ് നൽകേണ്ടത്. കുട്ടികളിൽ പ്രതിരോധ ശേഷി വർധിപ്പിക്കാൻ ലക്ഷ്യമിട്ടാണ് ബൂസ്റ്റർ ഡോസ് നൽകുന്നത്.
Also Read: പക്ഷികളെ വേട്ടയാടാൻ ഉപയോഗിക്കുന്ന കെണികൾ പിടികൂടി
എമിറേറ്റ്സ് ഹെൽത്ത് സർവിസസ്, അബൂദബി പബ്ലിക് ഹെൽത്ത് സെന്‍റർ, ദുബൈ ഹെൽത്ത് അതോറിറ്റി എന്നിവയുടെ പങ്കാളിത്തത്തോടെ ‘സ്വയം രക്ഷ, സമൂഹത്തിന്‍റെ രക്ഷ’ എന്ന തലക്കെട്ടിൽ നടത്തുന്ന കാമ്പയിനിൽ എല്ലാ ആരോഗ്യ കേന്ദ്രങ്ങളിലും സ്കൂൾ ക്ലിനിക്കുകളിലും വാക്സിൻ സൗജന്യമായി ലഭിക്കുമെന്ന് അധികൃതർ അറിയിച്ചു.
