വാഷിങ്ടൺ: അമേരിക്കൻ പ്രതിരോധ മന്ത്രിയായി മുൻ സൈനികനും, ഫോക്സ് ന്യൂസ് അവതാരകനുമായ പീറ്റ് ഹെഗ്സെത്തിനെ നിയമിച്ച് നിയുക്ത പ്രസിഡന്റ് ഡോണൾഡ് ട്രംപ്. ഇറാഖ്, അഫ്ഗാനിസ്ഥാൻ യുദ്ധങ്ങളിൽ പങ്കാളിയായ സൈനികനാണ് പീറ്റ്. പീറ്റിന്റെ ഇത്തരം അനുഭവങ്ങൾ മുതൽകൂട്ടാവുമെന്നാണ് ട്രംപ് പറയുന്നത്.
കടുത്ത തീരുമാനങ്ങളെടുക്കുന്ന, മിടുക്കനായ വ്യക്തിയും അമേരിക്കൻ നയ വിശ്വാസിയുമാണ് പീറ്റ്. അമേരിക്കൻ ഉപരോധ സേനയുടെ തലപ്പത്ത് പീറ്റ് ഉള്ളപ്പോൾ ശത്രുക്കൾ ഭയക്കും, നമ്മുടെ സൈന്യം വീണ്ടും മഹത്തരമാകും. അമേരിക്ക ഇനി ഒരിക്കലും തലകുനിയ്ക്കുകയില്ലെന്നും ട്രംപ് പറഞ്ഞു.
Also Read: യുദ്ധത്തില്‍ ഉത്തരകൊറിയന്‍ പട്ടാളക്കാരും; ഒടുവില്‍ റഷ്യയുടെ സ്ഥിരീകരണമെത്തി
ഫോക്സ് ന്യൂസ് ചാനലിൽ 2014 മുതലാണ് പീറ്റ് പ്രവർത്തനമാരംഭിച്ചത്. മിനസോട്ടയിൽ ജനിച്ച പീറ്റ് പ്രിൻസ്ടൻ സർവകലാശാലയിൽ നിന്ന് ബിരുദം നേടി. അതിനു ശേഷം ഹാർവഡ് കെന്നഡി സ്കൂളിൽ നിന്ന് പൊതുനയത്തിൽ ബിരുദാനന്തര ബിരുദം നേടി. അമേരിക്കൻ സൈന്യത്തിന്റെ ഭാഗമായി ഇറാൻ, അഫ്ഗാനിസ്ഥാൻ, ക്യൂബയിലെ ഗ്വാണ്ടനാമോ ബേ എന്നിവിടങ്ങളിൽ പ്രവർത്തിച്ചിട്ടുമുണ്ട്. ട്രംപ് നയങ്ങളുടെ കടുത്ത ആരാധകനാണ് പീറ്റ്.
Also Read: ആകാശച്ചുഴി; ലുഫ്താൻസ വിമാനത്തിലെ യാത്രക്കാർക്ക് പരിക്ക്
സൂസി വിൽസിനെ ആണ് ട്രംപിന്റെ വൈറ്റ് ഹൗസ് ചീഫ് ഓഫ് സ്റ്റാഫ് ആയി ട്രംപ് നിയമിച്ചത്. ആഭ്യന്തര സുരക്ഷ സെക്രട്ടറിയായി നിയമിച്ചിരിക്കുന്നത് ക്രിസ്തി നോയമിനെയാണ്.മൈക് വാൾട്സ് ആണ് ദേശീയ സുരക്ഷ ഉപദേഷ്ടാവ്. ജോൺ റാറ്റ്ക്ലിഫ് ആണ് സി.ഐ.എ മേധാവി. ബിൽ മക്ഗിൻലിയെ വൈറ്റ്ഹൗസ് കോൺസുൽ ആയും ട്രംപ് നിയമിച്ചു.
