തിരുവനന്തപുരം: മലപ്പുറത്തും കോഴക്കോടും വെസ്റ്റ് നൈല് പനി റിപ്പോര്ട്ട് ചെയ്ത സാഹചര്യത്തില് ജില്ലകള്ക്ക് ജാഗ്രതാ നിര്ദേശം നല്കിയതായി ആരോഗ്യ വകുപ്പ് മന്ത്രി വീണാ ജോര്ജ്. വെസ്റ്റ് നൈല് പനിയെ പ്രതിരോധിക്കാന് കൊതുക് നിവാരണവും ഉറവിട നശീകരണവും പ്രധാനമാണെന്ന് മന്ത്രി അറിയിച്ചു.
ജില്ലാ വെക്ടര് കണ്ട്രോള് യൂണിറ്റ് വിവിധ ഭാഗങ്ങളില് നിന്നും സാമ്പിളുകള് ശേഖരിച്ച് പരിശോധനയ്ക്കയച്ചു. അവബോധ പ്രവര്ത്തനങ്ങള് ശക്തമാക്കാനും നിര്ദേശം നല്കി. 2011 മുതല് സംസ്ഥാനത്ത് വിവിധ ജില്ലകളില് വെസ്റ്റ് നൈല് റിപ്പോര്ട്ട് ചെയ്യപ്പെടുന്നുണ്ട്. ആശങ്കപ്പെടേണ്ട കാര്യമില്ല. പനിയോ മറ്റ് രോഗ ലക്ഷണങ്ങളോ ഉണ്ടെങ്കില് ഉടന് തന്നെ ചികിത്സ തേടേണ്ടതാണെന്നും മന്ത്രി അഭ്യര്ത്ഥിച്ചു.
ജപ്പാന് ജ്വരത്തിന് സമാനമായ രോഗ ലക്ഷണങ്ങളോടെയാണ് വെസ്റ്റ് നൈല് പനിയും കാണാറുള്ളത്. എന്നാല് ജപ്പാന് ജ്വരത്തെ പോലെ രോഗം ഗുരുതരമാകാറില്ല. എങ്കിലും ജാഗ്രത പാലിക്കണം. കൊതുകിന്റെ ഉറവിട നശീകരണത്തിന് പ്രാധാന്യം നല്കണം. വ്യക്തികള് വീടും പരിസരവും വൃത്തിയായി സൂക്ഷിക്കണം. വെള്ളം കെട്ടിനില്ക്കാതെ നോക്കണമെന്നും മന്ത്രി അറിയിച്ചു.