ഇലക്ട്രിക് ഇരുചക്ര വാഹന നിര്‍മ്മാതാക്കളായ സെലിയോ ഇ ബൈക്ക്‌സ് തങ്ങളുടെ പുതിയ ലോ-സ്പീഡ് ഇലക്ട്രിക് സ്‌കൂട്ടര്‍ X-MEN 2.0 വിപണിയില്‍ അവതരിപ്പിച്ചു. കമ്പനിയുടെ മറ്റൊരു ഇലക്ട്രിക് സ്‌കൂട്ടറായ എക്സ്-മെന്‍ സീരീസിന്റെ നവീകരിച്ച പതിപ്പാണിത്. മുന്‍ മോഡലിനേക്കാള്‍ മികച്ചതാക്കുന്ന ചില പുതിയ ഫീച്ചറുകളും സാങ്കേതികവിദ്യയും പുതിയ സ്‌കൂട്ടറില്‍ ഉപയോഗിച്ചിട്ടുണ്ടെന്ന് കമ്പനി പറയുന്നു. ആകര്‍ഷകമായ രൂപവും കരുത്തുറ്റ ബാറ്ററി പാക്കും സജ്ജീകരിച്ചിരിക്കുന്ന ഈ സ്‌കൂട്ടറിന്റെ പ്രാരംഭ എക്സ് ഷോറൂം വില 71,500 രൂപയാണ്. മൊത്തം നാല് വൈബ്രന്റ് കളര്‍ ഓപ്ഷനുകളോടെയാണ് കമ്പനി X-MEN 2.0 അവതരിപ്പിച്ചിരിക്കുന്നത്.
X-MEN 2.0 ലെഡ്-ആസിഡ്, ലിഥിയം-അയണ്‍ ബാറ്ററി പാക്കുകളുള്ള നാല് വ്യത്യസ്ത വേരിയന്റുകളില്‍ വരുന്നു. ലെഡ് ആസിഡ് വേരിയന്റുകള്‍ക്ക് 60V 32AH മോഡലിന് 71,500 രൂപയും 72V 32AH മോഡലിന് 74,000 രൂപയുമാണ് വില. കൂടുതല്‍ വിപുലമായ ലിഥിയം-അയണ്‍ വേരിയന്റുകള്‍ 60V 30AH മോഡലിന് 87,500 രൂപയ്ക്കും 74V 32AH മോഡലിന് 91,500 രൂപയ്ക്കും ലഭ്യമാണ്. സാധാരണക്കാരുടെ ദൈനംദിന യാത്രാ ആവശ്യങ്ങള്‍ നിറവേറ്റാന്‍ കഴിയുന്ന തരത്തിലാണ് ഈ സ്‌കൂട്ടര്‍ രൂപകല്പന ചെയ്തിരിക്കുന്നതെന്ന് കമ്പനി പറയുന്നു. കോളേജ് വിദ്യാര്‍ത്ഥികളെയും ഓഫീസില്‍ പോകുന്നവരെയും നഗരത്തിലെ യാത്രക്കാരെയും കണക്കിലെടുത്താണ് ഈ സ്‌കൂട്ടറിന്റെ ഡിസൈന്‍.
Also Read: ഡിസയറിന് പിന്നാലെ പുതിയ അമേസിന്റെ ഡിസൈന്‍ സ്‌കെച്ചുകള്‍ പുറത്തുവിട്ട് ഹോണ്ട!
X-MEN 2.0 ന്റെ രൂപവും രൂപകല്‍പ്പനയും മുന്‍ മോഡലിന് സമാനമാണ്. എന്നാല്‍ ഇതില്‍ ചില സൗന്ദര്യവര്‍ദ്ധക മാറ്റങ്ങള്‍ കമ്പനി വരുത്തിയിട്ടുണ്ട്. ഒരു ലോ-സ്പീഡ് ഇലക്ട്രിക് സ്‌കൂട്ടര്‍ എന്ന നിലയില്‍, 60/72V ശേഷിയുള്ള BLDC ഇലക്ട്രിക് മോട്ടോര്‍ ഉണ്ട്. ഈ സ്‌കൂട്ടര്‍ ഒറ്റ ചാര്‍ജില്‍ പരമാവധി 100 കിലോമീറ്റര്‍ ഡ്രൈവിംഗ് റേഞ്ച് നല്‍കുമെന്നും അതിന്റെ ടോപ് സ്പീഡ് മണിക്കൂറില്‍ 25 കിലോമീറ്ററാണെന്നും കമ്പനി പറയുന്നു.
7.50 രൂപയ്ക്ക് ഫുള്‍ ചാര്‍ജ്
ഈ ഇലക്ട്രിക് സ്‌കൂട്ടറിന്റെ ബാറ്ററി പൂര്‍ണമായി ചാര്‍ജ് ചെയ്യാന്‍ പരമാവധി 1.5 യൂണിറ്റ് വൈദ്യുതി മതിയെന്ന് സെലിയോ അവകാശപ്പെടുന്നു. അങ്ങനെയാണെങ്കില്‍ കേരളത്തില്‍ ഈ സ്‌കൂട്ടര്‍ ഉപയോഗിക്കുകയാണെങ്കില്‍, ആദ്യ 100 യൂണിറ്റ് വൈദ്യുതിക്ക് ഏകദേശം നാല് രൂപയോളമാണ് യൂണിറ്റിന് നിരക്ക് വരുന്നത്. ഇങ്ങനെ നോക്കിയാല്‍ യൂണിറ്റിന് ശരാശരി അഞ്ച് രൂപ വച്ച് കണക്കാക്കിയാലും 1.5 യൂണിറ്റ് വൈദ്യുതിക്ക് പരമാവധി 7.5 രൂപ മാത്രം ചെലവാക്കിയാല്‍ മതിയാകും. അതായത് വെറും ഏഴര രൂപയ്ക്ക് നിങ്ങള്‍ക്ക് ഏകദേശം 100 കിലോമീറ്റര്‍ ദൂരം ഡ്രൈവിംഗ് റേഞ്ച് ലഭിക്കും.
X-MEN 2.0 യില്‍ കമ്പനി ചില പ്രത്യേക സവിശേഷതകള്‍ ഉള്‍പ്പെടുത്തിയിട്ടുണ്ട്. മുന്നിലും പിന്നിലും ഡിസ്‌ക് ബ്രേക്കുകള്‍ക്ക് പുറമെ മുന്‍വശത്ത് അലോയ് വീലുകളുമുണ്ട്. പിന്‍ ചക്രം ഹബ് മോട്ടോറുമായി ബന്ധിപ്പിച്ചിരിക്കുന്നു. മുന്നില്‍ ടെലിസ്‌കോപ്പിക് ഫോര്‍ക്കും പിന്നില്‍ സ്പ്രിംഗ് ലോഡഡ് ഷോക്ക് അബ്‌സോര്‍ബര്‍ സസ്‌പെന്‍ഷനും ലഭ്യമാണ്. ഇതിനുപുറമെ, ആന്റി തെഫ്റ്റ് അലാറം, പാര്‍ക്കിംഗ് സ്വിച്ച്, റിവേഴ്‌സ് ഗിയര്‍, യുഎസ്ബി ഫോണ്‍ ചാര്‍ജിംഗ് പോര്‍ട്ട്, ഡിജിറ്റല്‍ ഡിസ്‌പ്ലേ, ഓട്ടോ റിപ്പയര്‍ സ്വിച്ച്, സെന്‍ട്രല്‍ ലോക്കിംഗ് തുടങ്ങിയ സവിശേഷതകള്‍ ഈ സ്‌കൂട്ടറില്‍ ഉണ്ട്.
ചാര്‍ജിംഗ് സമയവും പേലോഡും
90 കിലോഗ്രാം ഭാരമുള്ള ഇലക്ട്രിക് സ്‌കൂട്ടറിന് 180 കിലോഗ്രാം വരെ ഭാരം വഹിക്കാന്‍ കഴിയും. അതായത് രണ്ട് പേര്‍ക്ക് ഇതില്‍ എളുപ്പത്തില്‍ യാത്ര ചെയ്യാം. കൂടാതെ, രണ്ട് വ്യത്യസ്ത ബാറ്ററി പായ്ക്കുകള്‍ ഉപയോഗിച്ചാണ് ഇത് അവതരിപ്പിച്ചിരിക്കുന്നത്. ലിഥിയം ബാറ്ററി പൂര്‍ണ്ണമായും ചാര്‍ജ് ചെയ്യാന്‍ നാല് മുതല്‍ അഞ്ച് മണിക്കൂര്‍ വരെ എടുക്കും. ലെഡ്-ആസിഡ് ബാറ്ററി പൂര്‍ണ്ണമായി ചാര്‍ജ് ചെയ്യാന്‍ എട്ട് മുതല്‍ 10 മണിക്കൂര്‍ വരെ സമയം എടുക്കും.
വാറന്റി
രണ്ട് ബാറ്ററി വകഭേദങ്ങള്‍ക്കും സമഗ്രമായ ഒരു വര്‍ഷത്തെ അല്ലെങ്കില്‍ 10,000 കിലോമീറ്റര്‍ വാറന്റിയും കമ്പനി നല്‍കുന്നു. ഗ്രീന്‍, വൈറ്റ്, സില്‍വര്‍, റെഡ് എന്നിങ്ങനെ നാല് നിറങ്ങളില്‍ സ്‌കൂട്ടര്‍ ലഭ്യമാണ്. 2021-ല്‍ സ്ഥാപിതമായതുമുതല്‍ , സെലിയോ ഇന്ത്യന്‍ വിപണിയില്‍ അതിന്റെ സാന്നിധ്യം അതിവേഗം വിപുലീകരിച്ചു. നിലവില്‍ 256ല്‍ അധികം ഡീലര്‍ഷിപ്പുകളുടെ ഒരു ശൃംഖല കെട്ടിപ്പടുക്കുകയും 200,000-ത്തിലധികം ഉപഭോക്താക്കള്‍ക്ക് സേവനം നല്‍കുകയും ചെയ്യുന്നു. 2025 മാര്‍ച്ചോടെ 400 ഡീലര്‍ഷിപ്പുകളിലേക്ക് വ്യാപിപ്പിക്കാന്‍ കമ്പനിക്ക് വിപുലമായ പദ്ധതികളും ഉണ്ട്.
