ഹൂസ്റ്റണ്‍ : ഇത്രയും നാള്‍ മുന്‍ പ്രസിഡന്റ് ഡൊണാള്‍ഡ് ട്രംപിനെ നേരിട്ട് ആക്രമിക്കാന്‍ ഇന്ത്യന്‍ വംശജയായ നിക്കി ഹേലി തയാറായിരുന്നില്ല. ട്രംപാണെങ്കില്‍ നാഴികയ്ക്ക് നാല്‍പ്പതു വട്ടം ഹേലിക്കെരിരേ രൂക്ഷമായ ആക്രമങ്ങളാണ് അഴിച്ചു വിടുന്നത്. കഴിവുള്ള സ്ത്രീ അല്ലെന്നു വരെ ട്രംപ് പറഞ്ഞു വച്ചിട്ടും ഹേലി പ്രതികരിച്ചില്ല. എന്നാല്‍ കാര്യങ്ങള്‍ കീഴ്‌മേല്‍ മറിയുകയാണ്. ട്രംപിനെതിരേ അദ്ദേഹത്തിന് ഏറ്റവും ദോഷകരമായി ബാധിച്ചേക്കാവുന്ന ആക്രമണവുമായി ഹേലി കളം നിറയുകയാണ്.
അമേരിക്കന്‍ തെരഞ്ഞെടുപ്പിന് മുമ്പ് തന്റെ പ്രചാരണത്തിന് ശക്തിപകര്‍ന്നു കൊണ്ട് ഇന്ത്യന്‍ – അമേരിക്കന്‍ പ്രസിഡന്റ് സ്ഥാനാര്‍ത്ഥി നിക്കി ഹേലി റിപ്പബ്ലിക്കന്‍ എതിരാളി ഡൊണാള്‍ഡ് ട്രംപിനെതിരായ ആക്രമണത്തിന് മൂര്‍ച്ചകൂട്ടിയത് സ്വന്തം നിലനില്‍പ്പ് അപകടത്തിലായെന്ന് തിരിച്ചറിഞ്ഞാണെന്നാണ് രാഷ്ട്രീയ നിരീക്ഷകര്‍ കണക്കു കൂട്ടുന്നത്. ട്രംപിന്റെ കീഴില്‍ യുഎന്‍ അംബാസഡറായി സേവനമനുഷ്ഠിച്ച ഹേലി, മുന്‍ പ്രസിഡന്റ് ഉയര്‍ന്ന സ്ഥാനത്തേക്ക് മത്സരിക്കാന്‍ മാനസികമായി അയോഗ്യനാണെന്ന് അവകാശപ്പെട്ടാണ് രംഗത്തുവന്നിരിക്കുന്നത്.
ഹേലിയെ മുന്‍ സ്പീക്കര്‍ നാന്‍സി പെലോസിയായി തെറ്റിദ്ധരിച്ച് ട്രംപ് നടത്തിയ ആക്രമണമാണ് ഹേലിക്ക് പിടിവള്ളിയായത്. 2021 ജനുവരി 6 ലെ യുഎസ് തലസ്ഥാനത്തെ കലാപം തടയുന്നതില്‍ ഹേലി പരാജയപ്പെട്ടതായാണ് 77 വയസുകാരനായ ട്രംപ് ആരോപിച്ചത്. എന്നാല്‍ അന്ന് അധികാര സ്ഥാനത്തില്ലാതിരുന്ന ഹേലി, താന്‍ എങ്ങനെ കലാപം തടയും എന്നാണ് ചോദിക്കുന്നത്. സ്പീക്കറായിരുന്ന പെലോസിയെ ഹേലിയുമായി തെറ്റിദ്ധരിച്ചാണ് ട്രംപ് ഇത്തരമൊരു ആക്രമണം നടത്തിയതെന്നാണ് സൂചന.
‘ഇന്നലെ രാത്രി, ട്രംപ് ഒരു റാലിയിലാണ്… ക്യാപ്പിറ്റോള്‍ കലാപത്തില്‍ ഞാന്‍ എന്തുകൊണ്ട് സുരക്ഷ എടുത്തില്ല, എന്തുകൊണ്ട് ജനുവരി 6 ഞാന്‍ നന്നായി കൈകാര്യം ചെയ്തില്ല എന്നതിനെക്കുറിച്ച് അദ്ദേഹം എന്നെ പലതവണ പരാമര്‍ശിച്ചുകൊണ്ടിരുന്നു. ജനുവരി 6 ന് ഡിസിയില്‍ പോലും. ഞാന്‍ ഉണ്ടായിരുന്നില്ല.’ ഹേലി പറഞ്ഞു.
ഇതുവരെ, ട്രംപിനെതിരായ നേരിട്ടുള്ള ആക്രമണങ്ങള്‍ ഹാലി ഒഴിവാക്കിയിരുന്നു, എന്നാല്‍ തിരഞ്ഞെടുപ്പ് മത്സരം ചൂടുപിടിക്കുമ്പോള്‍, ട്രംപിന്റെ വിമര്‍ശനങ്ങളോട് കൂടുതല്‍ ആക്രമണാത്മക സമീപനമാണ് അവര്‍ സ്വീകരിച്ചത്.
അമേരിക്കന്‍ പ്രസിഡന്റ് ജോ ബൈഡന്റെ വാര്‍ധക്യത്തെ റിപ്പബ്ലിക്കന്‍മാര്‍ നിരന്തരം ആക്രമിച്ചുവരികയാണ്. അദ്ദേഹത്തെ ഉന്നത പദവി കൈകാര്യം ചെയ്യാന്‍ കഴിവില്ലാത്തവനാണെന്ന് മുദ്രകുത്താനും ശ്രമിച്ചു കൊണ്ടിരിക്കുകയാണ്. അതേ ആരോപണമാണ് ഹേലി ഇപ്പോള്‍ ട്രംപിന് നേരെ ഉന്നയിച്ചിരിക്കുന്നത്.
‘ഒരു രാജ്യം താറുമാറാകുകയും ലോകം തീപിടിക്കുകയും ചെയ്യുമ്പോള്‍, 80 വയസ്സുള്ള രണ്ട് പേര് പ്രസിഡന്റ് സ്ഥാനത്തേക്ക് മത്സരിക്കാന്‍ നിങ്ങള്‍ ആഗ്രഹിക്കുന്നുണ്ടോ?’ അയോവയ്ക്ക് ശേഷം വോട്ട് രേഖപ്പെടുത്തിയ രണ്ടാമത്തെ സംസ്ഥാനമായ ന്യൂ ഹാംഷെയറില്‍ അടുത്തിടെ നടന്ന ഒരു പൊതുയോഗത്തില്‍ 52 കാരിയായ ഹേലി ചോദിച്ചു.
തെരഞ്ഞെടുപ്പില്‍ ഹേലി തന്നെ പരാജയപ്പെടുത്താനുള്ള സാധ്യത ട്രംപ് തള്ളിക്കളഞ്ഞെങ്കിലും മുന്‍ യുഎസ് പ്രസിഡന്റ് തന്റെ മുന്‍ അംബാസഡറിനെതിരെ സമ്പൂര്‍ണ ആക്രമണം അഴിച്ചുവിട്ടത് ശ്രദ്ധേയമായി. ട്രൂത്ത് സോഷ്യലിലെ ഒരു പോസ്റ്റില്‍, ട്രംപ് ഹേലിയുടെ ഇന്ത്യന്‍ പൈതൃകത്തെ വിമര്‍ശിക്കുകയും ചെയ്തു. ‘അവരുടെ ആദ്യ നാമമായ ‘നിമരത’ ‘നിമ്രദ’ എന്ന് തെറ്റിദ്ധരിച്ചു. ഇന്ത്യന്‍ കുടിയേറ്റക്കാരായ മാതാപിതാക്കള്‍ക്ക് ജനിച്ച ഹേലിക്ക് നിമരത ‘നിക്കി’ രണ്‍ധാവ എന്നായിരുന്നു പേര്. വിവാഹത്തിന് ശേഷമാണ് പേര് മാറ്റിയത്.
‘എനിക്ക് പ്രസിഡന്റ് ട്രംപിനെ നന്നായി അറിയാം. അയാള്‍ക്ക് ഭീഷണി തോന്നുമ്പോള്‍ അതാണ് ചെയ്യുന്നത്. ഞാന്‍ ഈ കാര്യങ്ങള്‍ വ്യക്തിപരമായി എടുക്കുന്നില്ല,’ ഹേലിയെ ഉദ്ധരിച്ച് ദി ഗാര്‍ഡിയനിലെ ഒരു റിപ്പോര്‍ട്ട് പറയുന്നു. എന്നിരുന്നാലും, ട്രംപിന്റെ സമീപകാല അധിക്ഷേപങ്ങളെ ഹേലിയുടെ പ്രചാരണ മാനേജര്‍ ‘കോപം’ എന്ന് തള്ളിക്കളഞ്ഞു.
ചൈനയുടെ ഷി ജിന്‍പിംഗ്, ഉത്തരകൊറിയയുടെ കിം ജോങ് ഉന്‍, റഷ്യയുടെ പുടിന്‍ തുടങ്ങിയ ശക്തരായ വ്യക്തികളുമായുള്ള ഡൊണാള്‍ഡ് ട്രംപിന്റെ ബന്ധവും ഹേലി ലക്ഷ്യമിടുന്നു രണ്ടുതവണ ഇംപീച്ച് ചെയ്യപ്പെട്ട യുഎസ് പ്രസിഡന്റില്‍ നിന്ന് പ്രശംസ നേടിയവരാണ് ഈ നേതാക്കള്‍.
‘ചൈന ഞങ്ങള്‍ക്ക് കോവിഡ് നല്‍കിയതിന് ശേഷം ഡൊണാള്‍ഡ് ട്രംപ് ഒരു ഡസന്‍ തവണ ഷിയെ പ്രശംസിച്ചു. ട്രംപിനെക്കാള്‍ ചൈനയോടും റഷ്യയോടും ഞാന്‍ കടുത്ത നിലപാടാണ് സ്വീകരിച്ചത്.’ – അവര്‍ എക്‌സിലെ ഒരു പോസ്റ്റില്‍ പറഞ്ഞു.
കിമ്മിന് ട്രംപ് പ്രണയലേഖനങ്ങള്‍ എഴുതിയെന്ന് ഹേലി ആരോപിച്ചു. ‘അദ്ദേഹം ഈ സ്വേച്ഛാധിപതികളോട് അഭിനിവേശത്തിലാണ്.’ – അവര്‍ പരിഹസിച്ചു.
