നോക്കിയയുടെ ആദ്യ ലാപ്ടോപ്പായ പ്യൂർബുക്ക് ശ്രേണിയിലെ X14 ഉടൻ ഇന്ത്യൻ വിപണിയിലെത്തും. നോക്കിയ പ്യൂർബുക്ക് X14-ന്റെ വരവ് കാണിച്ച് ഫ്ലിപ്പ്കാർട്ടിൽ ഒരു മൈക്രോ-സൈറ്റ് തന്നെ ആരംഭിച്ചിട്ടുണ്ട്. ഇതിന്റെ അടിസ്ഥാനത്തിൽ കറുപ്പ് നിറത്തിൽ മാത്രമാവും ഈ ലാപ്ടോപ്പ് വിപണിയിലെത്തുക. എന്നാൽ നോക്കിയ പ്യുർബുക്ക് X14 ലാപ്ടോപ്പിന്റെ ലോഞ്ച് തിയതി എന്നാണെന്നോ ഇന്ത്യയിലെ വിലയെണ്ടായിരിക്കുമെന്നോ വ്യക്തമാക്കിയിട്ടില്ല. ഇന്റൽ കോർ i5 പ്രൊസസർ ആയിരിക്കും നോക്കിയ പ്യൂർബുക്ക് X14-ന് എന്ന് വെബ്‌സൈറ്റ് വ്യക്തമാക്കുന്നു. ഡോൾബി അത്മൊസ്, ഡോൾബി വിഷൻ സാങ്കേതികവിദ്യകൾ ഈ ലാപ്‌ടോപ്പിലുണ്ടാവും. 1.1കിലോഗ്രാം മാത്രം ഭാരം വരുന്ന “അൾട്രലൈറ്റ്” നിർമാണമാണ് നോക്കിയ പ്യൂർബുക്ക് X14-ന്റെ മറ്റൊരു ആകർഷണം. ലാപ്ടോപ്പിന്റെ ചിത്രത്തിൽ യുഎസ്ബി 3.0, എച്ച്ഡിഎംഐ പോർട്ടുകളും പ്യൂർബുക്ക് X14-നുണ്ടാകും എന്ന് വ്യക്തമാണ്.
ബ്യൂറോ ഓഫ് ഇന്ത്യൻ സ്റ്റാൻഡേർഡ്സ് (ബിസ്) വെബ്‌സൈറ്റിലെ ലിസ്റ്റിംഗ് അനുസരിച്ച് ഒന്നിലധികം നോക്കിയ ലാപ്ടോപ്പുകൾ ഇന്ത്യയിൽ ലോഞ്ചിന് തയ്യാറെടുക്കുന്നുണ്ട്. നോക്കിയ പ്യുർബുക്ക് X14 ഈ നിരയിലെ ആദ്യ ലാപ്ടോപ്പ് ആയിരിക്കും.ഏകദേശം ഒമ്പതോളം നോക്കിയ പ്യുർബുക്ക് ലാപ്ടോപ്പുകൾ ഇന്ത്യയ്ക്കായി ഒരുങ്ങുന്നുണ്ട്. ഇതിൽ അഞ്ചെണ്ണത്തിന് ഇന്റൽ കോർ ഐ5 പ്രോസസറും നാലെണ്ണത്തിൽ ഇന്റൽ കോർ ഐ3 ചിപ്പുകളുമാവും. പത്താം തലമുറ പ്രോസസറുകൾ ആയിരിക്കും ഇവ. യഥാർത്ഥത്തിൽ നോക്കിയ ബ്രാൻഡിംഗ് ഉപയോഗിച്ച് ഒരു തേർഡ് പാർട്ടി ആവും ലാപ്ടോപ്പ് നിർമ്മിക്കുക എന്നാണ് വിവരം. ഫ്ലിപ്കാർട്ടിലൂടെ മാത്രമാവും നോക്കിയ ലാപ്ടോപ്പുകൾ വാങ്ങാൻ സാധിക്കുക.
